Tuir kandidatu prezidente Taur Matan Ruak (TMR) wainhira eleitu Prezidente da Republika Timor-Leste sei koopera hamutuk ho sidadaun tomak hodi harii Timor-Leste nudar nasaun ne’ebe maka riku, forte no hakmatek.
“Husi kampanha primeira ronda ho segundu ronda hau iha hanoin ida klaru katak hamutuk hari’i nasaun ida ne’ebe maka forte, riku no hakmatek,” dehan kandidatu TMR, iha debate ao vivo iha Radio Televisaun Timor–Leste (RTTL), Kaicoli, Dili, foin lalais (13/04) ba nasaun tomak bele assisti.
Tuir nia prezidente da republika nia papel define iha konstitusaun konsentra iha areas tolu importante.
“Ida iha kompetensia propiu; rua koordinador ba orgaun sira seluk, no tolu komandante ou Chefe das Forsas Armada.”
Nia afirma tan katak, demokrasia iha rai laran bele lao ho diak wainhira povu moris iha prosperioridade nia laran.
“Demokrasia tuir hau nia hare Estadu de direitu demokrasia so funsiona tuir ha nia pontu devista sei ita nia nasaun hetan dezenvolvementu nebe diak, sidadaun hetan moris diak, oan sira ba eskola, dalan ou estrada diak.”
Nia hateten tan katak Demokarasia la lao sei kaundu dezempregu barak, “Dezenvolvimentu ita nia nasaun paradu, la lao, demokrasia la funsiona.”
Nia mos refleta kona ba esperensia nebe nasaun sira balun hatudu ona katak demokrasia la funsiaona iha kondisaun nasaun nebe maka kiak no mukit nia laran.
Kandidato TMR apela audiensias atu hanoin kona ba demokrasia lao hamutuk ho dezenvolvimentu.
“Para atu hametin demokrasia ita persija dezenvolve, hadia povu nia moris purke sira sente katak barak tia ona moris iha nasaun ida nebe iha oportunidade para sidadaun sira hotu hadau sira nia moris, tanba ne’e hau mai ho hanaoin ida atu transforma Timor sai nasaun ida nebe maka riku, forte no hakmatek,” dehan kandidato TRM.
