Membru Parlamentu Nasional lamenta tebes ba fos nebe Ministeriu Solidariedade Sosial distribui ba ema kbi’it la’ek sira iha Timor laran tomak, tanba Xefe Aldeia sira iha Becora, Camea Has laran halo manipulasaun politika iha laran tanba wainhira ema simu fos subsidiu ne’e, obriga sira husu,o vota ba se.
“Iha ami nia aldeia fos ne’e fahe husi ministeriu social dehan sobrevivente ida hetan fos karon ida, mais Xefe Aldeia dehan fali sobrevivente nain rua, uma kain rua hetan fos karon ida,” levanta Deputada Tereza de Carvalho, iha plenaria Parlamentar, semana kotuk, (02/04).
Tuir Deputada de Carvalho, Komunidade sira iha Suku Camea, bairo Has laran ne’e lamenta tebes ba hahalok Xefe Aldeia nian hodi husu fali, ‘O vota ba se’?.
“Tanba ne’e mak husu ba, se fahe estadu nia fos, fahe ba mais labele uza fali partidu nia naran fahe fos,” Deputada ne’e husu.
Entertantu tuir Deputadu husi Bankada Fretilin, Antonino Bianco dehan, lolos labele akontese hanesan ne’e tanba ne’e fos estadu nian hodi fahe ba ema kbi’it la’ek sira.
“Ne’e rezultadu aban bainrua ema mos it abele sosa ho sasan osan ho sosa fos ka sosa buat hotu-hotu,”
‘Hahalok ida ne’e la’os hanorin demokrasia, mais hanorin fali buat seluk nebe la eduka ema,” dehan Deputadu Bianco.
Iha fatin hanesan Deputadu Estanislao, husu ba komisaun ne’ebe relevante tenke hare ba asuntu ne’e.
“Se akontese duni, tenke hola medidas ba ida ne’e purke hau mos dala barak fahe fos ne’e, ba vota ida ne’e ga ba vota ida neba,” Deputadu da Silva tenik.
Deputadu da Silva konta, uluk nia sei Ministru Agrikultura, ema hotu kestiona maka’as kona ba fahe trator, dehan fahe deit ba nia ema.
“Senhora Deputada Maria Paixao sira rasik tun ba iha baze hare buat ne’e la los, ne’eduni agora oportunidade diak ida atu ba hare, los ka lae,” Deputadu ne’e sujere.
Tuir nia, povu hakarak seriedade buat nebe gasta osan estadu nian ba povu nebe iha direitu atu simu fos ne’e.
Entretantu wainhira TDW koko konfirma asuntu ne’e ba iha Ministeriu Solidariedade Sosial maibe la konsege tanba Ministra Maria Domingas Alves desloka tiha ona ba Singapura.
