Judicial System Monitoring Program (JSMP) halo sosializasaun ka fahe informasaun kona ba papel Parlamentu Nasional (PN) no Governu nian ba komunidade sira iha Distritu Oe-Cusse,liu husi treinamentu loron ida tomak, atu sira mos hatene servisu husi orgaun rua ne’e.
Jeferino Bobo, Staf JSMP hafoin treinamentu hateten informasaun ne’ebé maka fehe durante treinamentu la ses husi rezultadu observasaun JSMP durante ne’e iha Uma Fukun Parlamentu Nasional li-liu prosesu halo lei tuir Konstituisaun RDTL.
“Nune’e ita nia komunidade hatene no kompriende knar parlamentu nian, halo lei, halo fiskalizasaun ba impaktu husi orsamentu jeral no desizaun politika balun parlamentu foti bazea rezulusaun,” Bobo informa.
‘’Kada tinan lima ita nia populasaun sira ba vota hodi hili sira nia nai ulun, hodi sai reprezenta sira nia lian, entaun parlamentu nasional tenke halo lei ne’ebé mak fo benefisio ba povu,,fiskaliza kualidade projeitu bazea verba ne’ebé mak tau tiha ona dezisaun politika basea ba resulusaun ruma,” Bobo esplika.
Joanico Tasi (65) nudar Partisipante ba iha treinamentu ne’e, konsidera programa desiminasaun informasaun ne’e importante, oinsa atu hatene knar PN no Governo, alende ne’e ajuda atu fihir lideransa molok partisipa iha eleisaun parlamentar ne’ebé sei realiza iha tinan ne’e.
‘’sim koalia ba Parlamentu Nasional ne’e la halai ses,husi forma governo, entaun ohin JSMP mai esplika ami, ne’e bele ajuda ona ami, pelumenus ami iha ona bayangan hodi hili lideransa iha elisaun parlamentar tinan ne’e,” Partisipante Tasi dehan.
Partisipante Maria Metan, katak ho treinamentu ne’e importante molok hakat ba eleisaun komesa iha ona hanoin atu hili lideransa ne’ebé maka iha kapasidade no merese atu ukun.
Entertantu Xefe Suku Bobo Case, Distritu Oe-Cusse Virgilho de Jesus agrdese ba JSMP tanba ajuda ona nia povu hodi fahe informasaun kona ba knar orgaun estadu hanesan PN, Governo,Presidente da republika no Tribunal ba sira.
“obrigado ba JSMP tanba ajuda hau ona fahe informasaun, povu barak mak ladun hatene kona ba serbisu estadu, governo tanba hau nia komunidade barak ladun asesu informasaun kona ba knar Parlamentu Nasional, Governo no Tribunal nian, Xefe Suku de Jesus fo agradese.
