Relasiona ho animal ne’ebe komunidade husik arbiru no halo foer iha sidade laran, Membru Palamentu Nasional husu atu komunidade sira sulan sira nia animal iha nia luhan laran.“Lolos ne’e labele akontese hanesan ne’e, ita tenki konsidera sidade ne’e hanesan kapital nasaun ida nian, tenki hare animal sira ne’e,” hateten Deputadu Augusto Tara, semana kotuk, (29/03) iha Uma Fukun, Dili.
Tuir Deputadu Tara, animal nain tenke iha konsiensia rasik atu sulan sira nia animal, no labele husik arbiru hanesan iha foho.
Deputadu Tara mos lamenta ho operasaun ekipa servisu hhusi Distritu Dili nian ne’ebe mosu lakon halo operasaun ba animal sira ne’ebe husik iha Dili laran ne’e.
“Uluk hau hare ekipa especial ida ba kaer animal sira ne’e, oho animal sira ne’e mais depois liu tiha fulan rua tolu nafatin hela, no sira lakon tiha deit,” Deputadu ne’e preokupa.
Governu tenki halo sosializasaun ba povu, atu sira bele kompriende no labele husik tan animal iha sidade Dili.
“Se husik nafatin Governu tenki fo ultimatu sira,wainhira husik nafatin tenki oho,” Deputadu ne’e katak.
Iha fatin hanesan Deputadu Estanislao da Silva hateten, se deit mak hakiak animal iha sidade laran tenki responsabilidade ba nia animal.
“Sidade tenki mos,” Deputadu da Silva dehan.
Deputadu da Silva mos husu ba motorist sira atu halai ho kuidadu, tanba se la’e bele monu bainhira animal korta.
“Ne’eduni tenki halo kampanha ida iha ita nia sidade laran, para hamos sidade no mos fo avizu ba ita nia populasaun sira nebe iha animal, tenki tau iha fatin atu nune’e animal sira labele la’o tun la’o sae arbiru,” Deputadu ne’e sujere.
Deputadu da Silva mos dehan, bainhira populasaun sira la iha konsinesia atu sulan animal sira ,estadu tenki hola mediadas.
“Uluk hahu tiha ona maibe balun hirus, balun aproveitamentu politiku dehan fali estadu la tau matan ba populasaun sira nia moris, hau hanoin buat sira ne’e tenki tau iha ida-idak nia fatin,” dehan Deputadu da Silva.
Entretantu bainhira TDW tenta konfirma asuntu ne’e ba iha Admistrador Distritu Dili maibe la konsege tanba Admistrador Gaspar la iha tempu atu responde asuntu ne’e.
