Ministerio Solidaridade Sosial (MSS) finaliza ona esbosu Politika Nasional ba Defisiente, no sei aprezenta ba iha Konselho Ministru (KM) iha fulan Abril ne’e hodi hetan aprovasaun.Diretor Nasional Asistensia Sosial (DNAS), Amandio Amaral Freitas hateten objetivu husi esbosu politika ne’e, atu fortifika no garante direitus ba ema defisiente sira.
“Hau hanoin ho politika ida ne’e ita bele iha kbi’it liu tan atu fotifika diak liu tan programa Ministerio Solidaridade Sosial, liu husi diresaun nasional asistensia sosial hodi asegura programa ne’ebe durante ne’e ministerio seidauk hala’o, bele inplementa diak liu tan nune’e ema difisente sira bele sente katak sira hetan duni atensaun,” hateten Diretor Freitas, semana kotuk (02/04) iha nia knar fatin Bemori, Dili.
Tuir Diretor Freitas, maske politika ne’e foin finalize, la signifika katak impede programa servisu asistensia ba defisiente maibe atu fortifika diak liu tan programa ne’ebe durante ne’e governu hala’o no ida ne’ebe seidauk hala’o bazeia ba politika nasional hodi bele asegura direitus ema defisiente nian atu asesu ba Saúde, Edukasaun, Justisa no Informasaun seluk tan hanesan ema kondisaun normal.
Nia hatutan, husi Governu anterior to’o Kuatru Governu Konstitusional ne’ebe mandatu besik kompleta ona, iha servisu asistensia barak mak MSS hala’o ona ba ema defisiente sira ho kategoria indireita no direita.
Mak hanesan bolsa da mae no asistensia umanitaria no apoiu fasilidade hanesan kursi roda, ai tonka no seluk tan, liu husi Instituisaun Non Governmental sira no apoiu organizasaun kada tinan governu supporta osamentu hodi apoiu programa ne’ebe organizasaun iha.
Iha parte seluk Membru Parlamentu Nasional, Deputadu Francisco Branco hateten tuir konstituisaun hateten ema hotu iha direitu atu asesu ba tratamentu ne’ebe hanesan maibe realidade ne’ebe iha durante tratamentu ba ema defisiente seidauk masimu, sei hetan diskriminasaun hanesan asesu ba transporte publiku.
“Ita labele para deit iha aprovasaun lei maibe inportante mak politika seriu ne’ebe atu implementa katak tratamentu ba ema hotu hanesan inklui mos defisiente,” dehan Deputadu Branco.
