“Liu tiha ona tinan 10 mak ita partisipa iha CPLP, tempu mos to’o ona ba ita atu kandidata an ba asumi Prezidenti CPLP nian,” hateten Ministru Albano, semana kotuk,(23/03) iha Pantai Kelapa, Dili.
Tuir Ministru Albano, Timor-Leste asumi kargu Prezidenti CPLP nian ba mandate tinan rua tuir regras ne’ebe iha.
“Sira hein deit Timor nia desizaun, tanba Konselhu Ministru hola tiha ona desizaun iha Maputu iha fulan Julhu ho hau, Ministru foun pelu menus prezidenti foun sei ba iha neba hodi konfirma Timor-Leste nia desizaun katak, Timor-Leste pronto atu asumi prezidenti CPLP nian iha 2014 to’o 2016,”Minstru Albano tenik.
Ministru Albano hatutan, agora dadaun Angola mak sai hanesan prezidenti, enkuantu Mocambique sei asumi prezidenti iha fulan Julhu iha Simeira Maputu.
Iha 2014, fulan Juliu “ita sei halo Simeria de Dili, liu husi Simeria de Dili mak marka prezidenti Timor-Leste ba CPLP nian,” Ministru katak.
“Hau hanoin tempu ida ke diak, dezafiu bo’ot mais tempu ida ke diak ita mos hatudu ba CPLP, hatudu ba mundu katak ita mos bele ona simu nasaun hitu sai nebe sai membru CPLP hamutuk ho ita,” dehan tan Ministru.
Tuir Ministru Albano, iha Simeria de Dili ne’e sei partisipa husi Xefe do Governu no Xefe de Estadu CPLP nian, mai halo reuniaun hamutuk iha Dili iha Fulan Jullhu.
Ministru Albano dehan, povu tomak seidauk hatene saida mak CPLP, tanba ne’e Ministeriu Negosiu Estranjeiru sei halo reuniaun bo’ot ida iha fulan Maiu hodi hato’o ba publiku.
Entertantu Deputadu Estanislao da Silva hateten, agora dadauk Prezidenti Parlamentu Fernando Lasama de Araujo mak asumi kargu Asembleia Parlamentar da CPLP ninian.
“Iha reuniaun nebe halao iha fulan Setembru tinan kotuk, halo planu atividades e agora ami hala’o planu atividades ne’e,” dehan Deputadu da Silva.
Aktividade nebe mak sira sei hala’o reuniaun oin mai iha Lisboa husi Prezidenti Grupu Nasionais nebe mak Deputadu Estanislao da Silva hamutuk ho Deputada Fernanda Lay, Sekretaria Asembleia Parlamentar nia, dehan Deputada Jacinta Perreira.
“Ami agora atu reuniaun iha Lisboa atu tur hamutuk para atu hare asuntu ida ne’e depois mos hetan informasaun,ohin loron sira mos revizaun ba Estatutu CPLP ninian,fo mos ideas oinsa para atu hari Sede fiksa ba Asembleia Parlamentar CPLP ninian,I hare oinsa mos bele kordena servisu diak liutan,” Deputada ne’e katak.
