Tuir Ministru Negosiu Estranjeiru Zacarias Albano da Costa, hateten Timor-Leste atu tama ASEAN depende Governu foun nebe mai, tenki tau nafatin prioridade asuntu ne’e.
“Hau bele dehan tinan rua ou tinan tolu, hau hare senhor Prezidenti ninia deklarasaun dehan 2013, e hau labele dehan 2013 maibe hau bele asegura katak iha tinan rua ou tinan tolu, se buat hotu la’o didiak, se Governu tau nafatin ASEAN hanesan prioridade,” hateten Ministru da Costa, iha Salaun enkontru MNE, semana kotuk, (23/03) Pantai Kelapa, Dili.
Ministru da Costa informa, agora dadaun Ministru rua, Ministru Economia Dezenvolvimentu no Ministra Finansas simu konvite atu partisipa reuniaun sektorais ho Ministeriu Economia Dezenvolvimentu ASEAN nian.
“Hau koalia dala barak ona Ministru Negosiu Estranjeiru ASEAN nian, sira hotu-hotu konkorda katak, desizaun tenki desizaun poilitika,” dehan Miinistru da Costa.
Timor leste tama Asean responsabilidade “ita hotu nian servisu makas liu tan hodi bele hetan konfiansa husi nasaun sira iha ASEAN,”
Ministru da Costa katak, 2015 ASEAN sai komunidade nebe integrada, dinamiku tebe-tebes ijezi komunidade sira nebe mak iha parte ida ne’e komitmentu tuir regras nebe mak iha.
“Hau nudar lider politiku ida hau nia komentariu mak ne’e hau hakarak husik apelu ida ba partidu hotu-hotu nebe involvidu iha prosesu ida ne’e para la’o ho hakmatek, e hau husu ba militante sira labele ran nakali demais,” Nia apela.
Wainhira Timor –Leste tama ba Asean Governu liu husi instituisaun hotu-hotu tenki preparadu atu hasoru impaktu nebe mak sei hasoru.
“Ita hare katak, iha nivel hotu-hotu la’os deit ekonomia,la’os deit iha politika, la’os deit iha direitus umanus, la’os deit iha finansas mais ita tama ba iha ASEAN, ita sei hetan impaktu bo’ot iha ita nia moris iha tempu loro-loron,” Nia tenik tan.
“Iha lei barak ita tenki ajusta,iha akordu bara-barak mak ita tenki asina,iha inisiativa reuniaun bara-barak mak ita tenki tuir,”
Entertantu Membru Parlamentu Nasional, Deputadu Mario Viegas Carascalao hatete Timor –Leste priense ona kriteria maibe sei minimu tanba aspetu ekonomiku sei fraku.
“Ita hare kondisoens politika Timor iha atu tama iha ASEAN maibe aspetu ekonomiku ita defisil atu akompania atividade sira iha ASEAN,” dehan Deputadu ne’e.
Tuir nia, bainhra tama ona ASEAN la’os deit hare deit ASEAN maibe mos hare pasifikiu du sul nian tanba TL tama hotu iha parte rua ne’e.
“Hau hare to’o agora seidauk iha debate publiku ida ke diak ,vantazen kona ba aspetu ekonomia nian ne’e,” Deputadu ne’e katak.
