Jornalista Max Stal nebe oras ne’e dadauk halo hela tratamentu intensive ho kondisaun saude grave oituan iha Ospital Inglatera, Membru Parlamentu Nasional liu husi Bankada UNDERTIM, Deputadu Faustino dos Santos alias Renan Selak, sei reza maka’as ba nia, nune’e bele rekopera hikas nia moras ne’e.
“Hau reza, halo orasaun para bele moris hodi rekopera tanba Jornalista ida nebe iha situasaun at nia laran nia konsege bele halo filmajen ba asaun funu deseziva ba funu libertasaun ninian,” dehan Deputadu Selak, semana kotuk,(27/03) iha Uma Fukun, Dili.
Jornalista Max Stall desloka ba iha nasaun Inglatera hodi halo tratamentu ba nia moras tanba nia hetan moras Kankru iha kakorok.
Deputadu Selak dehan, liu husi nia filmajen ba akontesementu Masakre 12 Novembru 1991, bolu atensaun ba iha mundu tomak hodi loke matan ba trajedia ne’e.
“Ho presaun sira ne’e mak ultimamente bele konkorda ho ita nia proposta atu aseita referendum iha Timor, nebe hau funu nain uluk kedas koinese ema ne’e liu husi informasaun hafoin funu remata mak hau rasik hare nia oin, nia imajen iha fotografia,” Deputadu Selak afirma.
Nia la haluha hato’o nia orsaun atu nune’e Jornalista ne’e bele rekopera nia moras.
“Hau hanoin Governu mos fo apoiu ruma,apoiu fo hanoin no apoiu orsamentu ruma atu bele halo n tratamentu hodi bele rekopera nia moras ne’e tanba uniku Jornalista ne’e brani tomak konsege Filme asaun desijiva ba ita nia funu libertasaun nian,”Selak sujere.
Entertantu Deputadu Mateus de Jesus katak, uniku Jornalista Max Stall mak halo filmajen konaba akontesementu 12 Novembru 1991 iha Santa Cruz, karik nia laiha mundu lahatene saida mak akontese iha Timor.
“Se Governu iha sentimentu ba nia bele fo apoiu ruma ba nia para nia halo tratamentu nia saude,” Deputadu ne’e sujere.
Iha fatin hanesan Deputadu Mario Viegas Carascalo informa, Governu tenki hare oinsa mak Jornalista ne’e bele rekopera fali nia moras.
“Hau rasik hatene katak, Max Stall ne’e bainhira Timor ne’e loke ona, nia tama nia mak espoin ba mundu, saida mak akontese iha Santa Cruz ne’e,” dehan Deputadu ne’e.
Governu rekoinese servisu Jornalista ne’e ninian tanba servisu ne’e servisu bo’ot ba povu Timor nia hakarak atu sai independenti.
