Diretora Nasional Relasaun du Trabalho, Auxiliadora De Gusmão Guterres hateten, lei kodigu laboral seidauk bele implementa tanba seidauk publika iha jornal da republika, depois sei halo sosializasaun ba iha publiku.
“To’o oras ne’e dadaun ita sei utilize regulamentu UNTAET nian nomor 5/2002, lei kodigu do trabalho foun promulga ona iha dia 2 de Fevereiru 2012, maibe seidauk publika iha jornal da republika entau seidauk bele halo sosializasaun ba komunidade, tantu ba trabalhadores inklui mos empregadores sira,” dehan Diretora Guterres, semana kotuk (26/03) iha knar fatin Kaikoli, Dili.
Diretora ne’e hatutan, depois de publika iha jornal da republika sira sei halo dialogu sosial tripartida entre governu, reprejentante trabalhador sira no mos empregador sira, nune’e antes tama iha fase implementasaun ema hotu kompriende kona ba artigu ida pur ida husi lei ne’e rasik.
Diretora Guterres afirma, lei ne’e la’os deit ba trabalhadores maibe mos atu regula oinsa mak trabalhadores no kompania ka empregador sira kumpri lei ne’ebe iha, hodi kria kondisaun diak ba trabalhador sira.
Diretora ne’e informa, reklamasaun ne’ebe trabalhador sira hatama tinan ne’e volume ki’ik kompara ho tinan sira uluk maibe iha violasaun barak maioria mai husi kompania estranjeiru inklui mos nasional.
Iha parte seluk Prezidente Konfederasaun Sindikatu Timor-Leste (KSTL), Jose da Conceição da Costa hateten, governu no sindikatu nudar reprejentante trabalhadores inklui mos emprezario sira, sei hala’o sosializasaun ba lei kodigu do trabalho ne’e, atu evita problema tanba se parte ida deit mak halao sosializasaun bele hamosu interpretasaun tuir sira nia hakarak entau sei hamosu problema iha implementasaun iha futuru.
“Ami hein hela bainhira mak sira determina orario atu halo sosializasaun iha teritorio tomak no sindikatu sei halo monitorizasaun ba implementasaun atu bele garantia katak implementasaun bazeia ba lei,” dehan Prezidente KSTL da Costa.
Nia hatutan, bainhira iha prosesu implementasaun la tuir lei, sindikatu sei hato’o lamentasaun ba governu maibe se emprezario ruma viola trabalhadores sira nia direitu sindikatu, sei hala’o enkontru tripartida.
Enkuantu Trabalhadora Domestika, Imaculada Soares dos Santos, espera katak ho lei ne’e bele ona proteje sira nia direitu.
“Nudar trabalhadora domestika ami espera katak ho lei kodigu do trabalho ne’e, bele proteje ami nia direitu, importante mak implementasaun tenke tuir lei ne’ebe iha ona katak empregadas ne’ebe viola ema nia direitu lei dehan fo sensaun tenke fo duni sensaun labele husik deit,” Trabalhadora dos Santos esperansa.
