Membru Parlamentu Nasional (PN) lamenta tebes ba buletin de votus nebe mak tu’u kuak iha Sentru Votasaun Hera antes votasaun hahu, no husu atu halo investigasaun ba kazu ne’e.“Ne’e mai husi nebe,hau hanoin kestaun ne’e tenke hare hodi halo investigasaun,” sujere Deputadu Antonio Cardoso, semana kotuk,(19/03) iha plenaria PN.
Deputadu husi Bankada Opozisaun Fretilin ne’e duvida ho servisu staf Sekretariadu Tekniku Administrasaun Eleitoral (STAE) nian. “Sira ne’e iha imparsial ka la’e,” Deputadu ne’e duvida.
Deputadu Cardoso mos lamenta ba eleisaun jeral foin liu ba ne’e, tanba ema moras sira iha Ospital Nasional (HNGV) la tuir votasaun.
“Ida ne’e tenki estuda, mekanismu oinsa ema nebe moras tenki partisipa iha votasaun, familia sira ne’ebe mai hein tenki vota, atu nune’e labele lakon votus,” Deputadu Cardoso preokupa.
Lamentasoens hanesan mos mai husi Deputadu Aderito Hugo, no presiza kria mekanismu ida atu resolve problema ne’e.
“Ami husu mekanismu nebe mak atu rezolve problema ida ne’e tenki halo andamentu mai oin para prevene atu labele akontese tan iha eventu bo’ot ida nebe ita presiza kredibilidade eleisaun nebe ita halo,” sujere Deputadu Hugo.
Eis Jornalista senior Timor Post ne’e, husu atu halo investigasaun ba kazu ne’e, hodi hatene se mak sai autor ba aktus ida ne’e.
“Atu hatene rezultadu nebe mak los, tenki kredibel, la’os hare se mak manan no se mak lakon maibe kualidade ba eventu ne’e mos tenki diak, no husu atu lori autor ba aktus ne’e atu prosesa tuir lei ne’ebe iha,” dehan Deputadu Hugo.
