Diretor Fundasaun Mahein (FM), Nelson Belo rekomenda ba iha Forsa Defeza Timor-Leste (F-FDTL atu sosa ro bo’ot ida nune’e bela halo seguransa iha area maritime Costa Sul nian, ro ki’ik ne’ebe sira uza durante ne’e labele hakur tasi bo’ot iha parte ne’eba.
“Agora ita iha ro hitu ga walu ida hanesan ne’e, mais ro sira ne’e labele hakur tasi mane ne’ebe laloran bo’ot, iha kosta sul ne’eba sira labele hakur tanba ro ne’e ki’ik, laloran mai, laloran bele baku sai tiha ro ne’e entaun ita presiza ro nebe mak bo’ot,” sujere Diretor FM. Belo, semana kotuk (22/03) iha Balide, Dili.
Maibe tuir Diretor Belo, antes sosa ro bo’ot tenki bazea ba estudu ida no mos prepara konstruksaun ou infrastrutura no ro bo’ot ne’e atu halo seguransa iha tasi.
“ Ro bo’ot ne’e nia funsaun bele hakur tasi mane no halo seguransa ba ema sira nebe maka halo peskas illegal ka mai naok ita nia riku soin iha tasi laran,” dehan Diretor Belo.
Entertantu membru Komisaun B Parlamentar, Deputadu Jose Texeira, ba tempu agora seidauk iha nesesariu atu sosa ro bo’ot maibe karik ba future.
“Hau nia hanoin no hau nia preokupasaun mak ne’e uluk ita lori ro rua mai ne’e deit ita iha problema,liu-liu kona ba portu ne’ebe to’o agora seidauk hotu, ne’ebe seidauk nesesariu, karik ba future,” hateten Deputadu Texeira.
Eis Ministru Turismu ne’e sujere, atu halo manutensaun deit ba ro ki’ik sira ne’ebe iha ona no kapasidade hodi reforsa forsa ne’e rasik. “Ita la’o lai depois mak ita to’o iha ne’eba,” Nia katak.
Kona ba portu Hera ne’ebe to’o agora seidauk hotu, Deputadu Teixeira husu ba Governu liu husi Sekretariu Estadu Defeza atu responsabili ba projetu ne’e.
