Tuir Segundu Komandante Polisia Nasional Timor-Leste (PNTL) Superintendente Afonso de Jesus katak polisia foun ho total 250 pesoas ne’ebe foin dadauk pasa iha rekrutamentu, obrigatoriumente tenke tuir treinamentu fiziku nian durante fulan rua iha Rairobo-Atabae, Distritu Bobonaro.
“Antes atu fahe sira, sira tenke tuir treinamentu baziku kona ba fisik nian, eduka sira nia mental atu forte, karik aban bainrua iha konfrontasaun ruma, sira bele responde ba situasaun ne’e,” hateten II Komandante de Jesus, semana kotuk (19/03) iha Kaikoli, Dili.
Segundu Komandante ne’e katak depois de remata treinamentu iha Rairobo, sira sei mai fali Dili tuir tan treinamentu kona ba lei no mos disiplina, e sira mos sei aprende servisu bazika kona polisia nian.
Iha lidun seluk tuir Membru Komisaun B Parlamentar, Deputada Maria Paixao katak oras ne’e dadaun membru polisia sira sei menus no espera katak depois de remata treinamentu polisia foun sira ne’e bele kompleta.
“Ita hare katak durante ne’e polisia sei menus iha fatin-fatin, ne’e hanesan preokupasaun bo’ot ida ba komunidade, e hein katak depois de sira remata sira nia treinamentu iha Rairobo, bele kompleta iha fatin-fatin para hodi bele halo estabilidade no dezenvolvementu nasaun la’o ho diak liu tan,” Deputada Paixao haktuir.
