Diretor Programa Monitorizasaun ba Sistema Judisial (JSMP) Luis de Oliveira Sampaio hateten kazu Diretor Ezekutivu Lalenok Ba Ema Hotu (LABEH) Christopher Hendry Samson sei pendenti hela iha Tribunal Rekursu (TR).
“Kazu Cristoper ne’e seidauk iha konkluzaun final ida no sei pendenti iha Tribunal Rekursu. Tribunal Rekursu mos la fo informasaun detalhadu kona ba impedimentu ne’e,” hatetenn Diretor JSMP Sampaio, semana kotuk (19/03) iha Colmera, Dili.
Tuir Diretor Sampaio, kazu ne’e sei pendenti iha TR tanba susar atu hetan juiz panel ka koletivu hodi halo avaliasaun ba desizaun Tribunal nian.
Diretor ne’e hatutan, oras ne’e dadaun Samson livre hela to’o Tribunal foti desizaun kona ba nia kazu ne’ebe halo rekursu ba TR.
Iha lidun seluk Deputada Fernanda Borges dehan Tribunal Rekursu halo servisu neneik liu no halo povu deskontente sira nia servisu ne’e tanba la iha transparensia.
“Kona ba kazu Cristopher Samson nian, hau lakohi mete iha tribunal nia servisu, hau nia hanoin ne’e indikasaun ida katak transparansia iha prosesu kazu sira tenke la’o diak e tenke fo sai informasaun,” dehan Prezidente Komisaun A Parlamentar Borges.
“Tribunal mos tenke servisu lais oituan, nune’e povu bele kontente tanba kazu barak mak nia prosesu tarde, tanba durante ne’e tribunal servisu neneik demais,” haktuir Deputada Borges.
Samson hetan akuzasaun husi Ministeriu Publiku (MP) kona-ba kazu falsifikasaun dokumentus nasionalidade Timor-leste no kazu des obidensia, inklui ho kazu 5 seluk ne’ebe MP dada hikas.
Tribunal halo julgamentu dala tolu ba kazu ne’e, primeiru no segundu julgamentu hala’o iha 04 no 25 Maiu 2011, enkuantu iha julgamentu ikus nian hala’o iha 14 Setembru 2011.
Iha terseiru julgamentu, TDD hamonu sentensa ba arguidu Samson ho tinan 3 fulan 6 pena prizaun maibe arguidu lamenta ho desizaun ne’e no halo pedidu rekursu ba TR.
