Relasiona ho populasaun barak mak la partisipa iha festa demokrasia iha eleisaun prezidensial iha primeira ronde (17/03) hodi ezerse sira nia direitu, tanba impaktu husi lei eleitoral artigu 40 ne’ebe dehan ‘sidadaun hotu tenke ba vota iha fatin ne’ebe sira resenseadu ba’, tanba ne’e Membru Parlamentu Nasional sujere ba meja Parlamentu atu altera tiha lei ne’e.
“Husu para ita tau atensaun lalais ba lei eleitoral iha artigu 40, atu nune’e bele fasilita ita nia sidadaun hotu-hotu bele ezersa sira nia direitu politiku iha fatin nebe deit,” sujere Deputadu Natalino dos Santos, semana kotuk (20/03) iha plenaria Parlamentu Nasional.
Tuir Deputadu dos Santos, katak iha eleisaun prezidensial iha primeira ronde, populasaun 26% mak la tuir votasaun tanba impaktu husi lei ne’e.
“Kestaun ne’e uluk ami foti tiha ona iha komisaun A rasik, maibe husi CNE ho STAE fo sira nia argumentu katak tenke hanesan ne’e para bele detekta sidadaun sira nebe namkari,” Deputadu dos Santos informa.
Tanba ne’e tenke halo alterasaun ba artigu 40 ne’e, atu nune’e bele fasilita sidadaun hotu-hotu bele ezersa sira nia direitu iha eleisaun prezidensial segunda ronde, iha fatiin ne’ebe deit .
Entertantu Deputada Virgina Ana Belo, kontra ba sujestaun ida ne’e tanba tempu la permiti ona atu halo alterasaun ba lei ne’e.
“Hau hanoin lei ne’e la fo dalan kedas ba ema para atu halo aktualizasaun baze de dadus, so ke informasaun ba ita nia ema sira mak ladun fo,” Deputada Belo hateten.
Nia hateten Sekretariadu Tekniku Administrasaun Eleitoral (STAE) fo tempu durante fulan hat nia laran ba ema nebe lakohi ba vota iha sira nia fatin, nia bele halo aktualizasaun ba iha baze de dadus para bele vota iha Dili.
Iha fatin hanesan Deputadu Arao Noe hateten, alterasaun ba lei eleitoral iha artigu 40 ne’e, tempu la sufsiente atu halo alterasaun ba lei ne’e hodi tama ba eleisaun Prezidensial iha segunda ronde.
“Hela deit loron 20 e tal la to’o para ita atu halo alterasaun ba lei ne’e tanba ne’e sei difikulta servisu STAE ho CNE nian,” Deputadu Noe katak. ‘Karik ba eleisaun Parlamentar nian bele.”
