Prokuradoria Jeral da Republika (PJR), Ana Maria Pesoa, lamenta tebes ho salariu nebe mak juiz sira simu tanba minimu liu kompara ho sira nia servisu.
“Ita labele eziji official justisa sira nia profesionalismu no ejensaun bainhira halo sira nia knar, bainhira ita hein kleur atu prosesa kazu ruma, liu tinan rua atu rekonese esforsu nebe feto no mane sira halo lor-loron, ami labele aseita no kontra buat ida ne’e, ami sei protesta nafatin, katak nia estatutu remuratoriu ga selu salariu kiak liu karik,” dehan PJR Pesoa, semana kotuk (13/03) bainhira hato’o relatoriu annual ba iha Parlamentu Nasional.
Tuir PJR Pesoa, alende impede sira sai professional iha sira nia profisaun, sira mos presisa sustenta sira nia moris familia nian ho salariu ne’ebe nato’on.
“Ita hotu hatene katak iha momentu ida nebe situasaun ekonomika defisil teb-tebes ba ita nia povu bar-barak, e sira nudar xefe familia ho responsabilidade todan presiza simu salariu nebe mak nato’on,” dehan prokuradoria Pesoa.
Iha fatin hanesan Prezidente Komisaun A Parlamentar, Deputada Fernanda Borges dehan, hasa’e salariu ba juiz sira depende sira nia produtividade.
“Ital abele koalia deit salariu, hasa’e salariu mais ita tenke hare mos substentavel ka la’e, ita mos hare produtividade ba Timor-leste husi ema sira ne’e iha duni ka la’e,” kritika Deputada Borges.
Prezidente Komisaun A Parlamentar ne’e husu ba estadu atu habarak treinamentu, la’os deit ba juiz no prokurador sira maibe ba ema hotu-hotu.
“Ita labele sura deit osan nebe mak fo ba sira, hanesan simu salariu, mais tenki sura mos estadu nia gastus atu kapasita sira tanba ida ne’e fila-fali ba sira nia an atu dezenvolve sira nia kapasidade umana atu nune’e sira bele servisu diak liu tan ba povu,” Deputada Borges dehan.
