Sekretariu Estadu Obras Publiku, Domingos Caero hateten, estrada sira nebe oras ne’e dadauk ke’e iha sidade laran no seidauk taka fali tanba udan ne’ebe akontese durante ne’e la fo fatin para atu hadia fali estrada ne’e.
Sekretariu Estadu Caero, dehan tuir lolos projetu rehabilitasaun estrada iha Dili laran seidauk bele entrega ba iha kompania sira atu ke’e, maibe tanba projetu ne’e anu fiscal tenki tama iha fulan Janeiru no implementasaun tenki tama iha Fevereiru.
“Se anu fiscal ita tau iha hanesan uluk Governu anterior nian, halo iha Jullu implementasaun tenki ser monu iha Setembru ka Outubru,” SE Caero tenik.
Sekretariu Estadu Caero, garante katak antes tama loron 20 fulan Maiu estrada sira ne’e bele remata ona.
“Ida hanesan iha portu oin ami hare hela, posibilidade ne’e mak hau sei bolu tekniku ida, atu hare para uza sumente ho britas,” dehan SE Caero.
Entretantu Deputadu Inacio Moreira, lamenta tebes ba estrada sira nebe mak kompania ke’e, agora sai at liutan fali.
“Hau mos lee informasoens husi media dehan, udan mak la fo tempu, maibe ami hakarak hateten katak, desizaun hadia estrada mak sala, tanba foti desizaun iha tempu udan,” kritika Deputadu Moreira.
Tanba ne’e, nia parte husu ba Ministeriu kompetente atu responsabiliza ba Estrada sira ne’e tanba uda se la para.
Iha fatin hanesan Prezidenti Komisaun G Parlamentar, Deputadu Pedro da Costa Martires dehan, hadia Estrada, ema hotu nia obrigasaun maibe uda mak la fo fatin.
“Aban bainrua imi manan ukun karik, imi halo fali to’ok ba, se bainhira buat ida sei akontese hanesan ne’e imi bele halo milagre rezolve lalais deit,” Deputadu ne’e tenik.
