Atu hasa’e liu tan produsaun hare agrikultor sira nian, tinan ne’e governu liu husi Ministeriu Agrikultura e Peska (MAP) sei hadia irigasaun iha Maliana II (Suku Tapo Memo).
Tuir Diretor Marcal, orsmentu ba projetu ne’e Ministeriu aprova tiha ona e hein para atu implementa deit.
“Ami aloka tiha ona orsamentu hamutuk US$ 500 mil e tal e espera katak iha fulan Junu ka Jullu bele bo’ok ona,” dehan Diretor Nasional Marcal, semana kotuk (20/03) iha lansamentu Programa Dezennvolvementu Rural da-hat nian (RDP IV) iha Edifisiu MAP, Comoro, Dili.
Diretor ne’e hatutan, prosesu tenderizasaun ba projetu ne’e, agora la’o hela e espera katak depois de projetu ne’e remata, agrikultor sira iha fatin ne’e bele halo sira natar ho diak.
“Rai sira ne’ebe durante ne’e husik hela tanba bee la to’o, bele halo hotu natar no ita nia produsaun hare bele aumenta no bele asegura seguransa aihan ba iha komunidade sira,” Diretor ne’e esperansa.
Entretantu Agrikultor Maliana II, Feliciano Mau, ne’ebe jornalista kontaktu via telephone, sente kontente ho planu ida ne’e tanba irigasaun ne’e aat tinan rua resin ona maibe governu seidauk hadia to’o ohin loron.
“Ne’e kapas maibe labele hadia deit irigasaun maibe mos hadia bee dalan ka kanu ne’ebe kotu iha area Mabilgol nian, tanba kuandu ida ne’e mak la hadia hanesan deit, bee la mai iha natar sira ne’ebe tun mai iha area Tunubibi nian,” Agrikultor Mau dehan.
Alende ne’e Agrikultor Mau mos husu ba Ministeriu Agrikultura e Peska (MAP), atu suporta aimoruk pestisida nian inklui adubu ba agrikultor sira iha Suku ne’e, nune’e produsaun hare ba tinan ida ne’e bele hetan rezultadu diak.
Tuir nia, kompara tinan kotuk, tinan ne’e diak tanba iha udan been ne’ebe nato’on no espera katak sei laiha failansu ruma to’o tama koileta.
“Ita husu bo’ot deit atu lalika iha gafenutu ka ular oan sira ne’ebe bele estraga hare tahan, se la’e la aproveita, mas hau fiar tinan ne’e sei hetan hasil ne’ebe diak,” Agrikultor Mau esperansa.
Agrikultor Mau informa, tinan-tinan sempre halo natar tolu, kada natar ida iha hectares rua to’o tolu (2-3 ha) no kona ba rezultadu depende ba klima. “udan diak hetan hasil diak, se ladiak, pasiensia, ba han nian deit e la fa’an,” Nia katak.
