Tanba laiha orsamentu, funsiunariu protokolu iha Parlamentu Nasional uza osan rasik sosa pulsa hodi halo kontaktu ho Deputadu sira en relasaun servisu Parlamentu nian.
“Hau hetan informasaun katak, sira la iha osan ba telefone, sira utiliza sira nia telefone rasik hodi telefone ba deputadu sira para hodi halo kontaktus,” hateten Deputadu Estanislao da Silva, iha plenaria semana kotuk (20/03).
Deputadu da Silva, lamenta tebes tanba funsionariu sira ne’e manan osan oituan deit e sira tenki utiliza sira nia osan hodi sosa pulsa telefone ba deputadu sira.
“Ida ne’e la justu, la iha justisa hau hanoin Parlamentu tenki hola medidas hare ba buat ida ne’e,” Deputadu ne’e lamenta
“Hau uluk sei iha Ministeriu Agrikultura, hau la husik funsionariu ida hasai doit metan iha sira nia bolsu hodi halo servisu ba estadu,” kompara eis Ministru Agrikultura e Peska ne’e.
Deputadu la manda funsionariu Parlamentu nian atu telefone ba sira tanba Deputadu la iha poder ezekutivu.
“Deputadu atu kontribui halo lei deit,ne’e Deputadu nia papel, atu implementa lei ne’e la’os Deputadu mak implementa lei ne’e,” hateten Deputadu Mario Viegas Carascalao.
