Udan no anin bo’ot ne’ebé tau Sexta (16/03) kalan iha kapital Distritu Oé-Cusse durante oras ida nia laran iha tuku sanulu resin ida kalan, konsege sobu uma kain 20 resin inklui edifisiu publiku.
Luduvina da Cunha ne’ebe hanesan vitima husi dezastre ne’e tanba anin sobu estraga nia uma, konta, antes akontesementu ne’e animal sira ne’ebe sira hakiak hanesan bibi, manu, karau no asu tanis hakilar hotu.
“Ami han kalan remata tiha ona, atu toba ona ho hau nia bei-oan sira maibe animal sira tanis entaun ami toba la dukur, lakleur mosu dezastre anin sobu ami nia uma kakuluk hodi soe iha estrada ibun, entau kalan ne’e ami iha udan been nia laran,” Vitima da Cunha konta.
Ho akontesementu, vitima sira agora hela provizoriumente iha Asrama Madre Dominikana hodi hein ajudus humanitarian husi Governu.
“Ami kal-kalan Madre sira mai tula ami hodi ba toba iha Asrama Dominikana, no oras ne’e nai ulun sira husi Governo, inklui Igreja foti ona dadus nune’e bele hetan ajuda,” Vitima da Cunha dehan.
Iha sorin seluk, Vitima Luis Prezados, hato’o ona relatoriu sobre dezastre ne’e ba iha administrasaun lokal, hodi buka solusaun ho lais tanba oras ne’e sira moris iha udan been nia laran.
‘’Hau mai iha ne’e atu hateten ba ita nia Governo, hodi bele hatene oinsa sira atu ajuda ka la’e, ami so hateten deit la ajuda mos la buat ida, hau nia uma ai has hun bo’ot mak haneha, ai no kalen no parede sira la aproveita,” hateten Luis Prezados sublinha.
Entretantu Xefe Aldeia Malelat, Alberto Sufa hateten, nia parte preokupa ho akontesementu ne’e, tanba alende sobu uma, mos estraga komunidade sira nia batar, hare, aifarina no ai han seluk sei la aproveita hotu.
“Batar no hare isin sei nurak, iha posibilidade atu plantasaun sira la moris fali sa’tan atu fo produsaun,” Xefe Sufa preokupa.
