Membru Parlamentu Nasional preokupa ho ai kameli hectares neen, ne’ebe governu anterior kuda iha Sub-distritu Tilomar, Distritu Suai barak mak mate tanba falta de manutensaun.
“Husi hectares neen, hectar ida besik atu mate hotu ona tanba governu la tau orsamentu atu hamos, para atu lere du’ut hodi labele estraga ai kameli ne’e,” preokupa Deputada Gertrudis Moniz, iha plenaria Parlamentar, semana kotuk (20/03) iha PN.
Deputada Moniz dehan,uluk komunidade sira hamos dala ida deit maibe to’o agora Governu la tau orsamentu atu hamos.
“Ai tali sira nebe mak mosu bobar fila-fali ai kameli sira ne’e entaun barak komesa mate ona,” Deputada ne’e preokupa.
Entertantu Membru Komisaun D Parlamentar, Deputadu Adriano Joao hateten, problema ne’e sensitive tebes no iha tempun badak komisaun sei desloka ba iha fatin neba hodi hare direitamente.
“Ai kameli ne’e hanesan riku soin Timor nian, presiza halo manutensaun, e hau sei pasa informasaun ne’e ba iha kolega sira komisaun D, talves rai maran iha tempu badak ami sei ba hare,” dehan Deputadu Joao.
