Tuir Deputadu Francisco Branco, katak alende Prezidente da Republika, Parlamentu Nasional no Tribunal, media mos iha poder bo’ot hodi hametin estadu de demokratiku iha nasaun demokratiku Timor-Leste.Deputadu Branco hato’o kestaun ne’e relasiona ho Lei Komunikasaun Sosial ne’ebe to’o agora sei pendent hela iha komisaun A no seidauk halo diskusaun iha plenaria Parlamentu.
“Ita hotu hatene media ne’e poder bo’ot ida iha nasaun demokratiku, kuandu la regula poder ida ne’e bele akontese tendensia abuzu de poder hotu-hotu,” dehan Deputadu Branco, semana kotuk (09/03) iha PN.
Deputadu husi Bankada Opozisaun Fretilin ne’e hatutan, lolos PN fo prioridade ba lei ida ne’e tanba bele hametin estadu.
Deputadu Branco dehan, mandatu Governu nian besik remata ona maibe to’o agora meja seidauk ajenda lei ne’e atu diskuti iha plenaria. “Karik seidauk prioridade ida ba lejislatura ida ne’e,” Branco tenik.
Entretantu Deputadu Mario Viegas Carracalao hateten, PN la biban ona atu diskuti lei komunikasaun social ne’e tanba lakleur tan mandatu deputadu sira nia remata.
“Karik biban mos, hau hanoin ita halo audensia ba lei balun deit, tanba depois de eleisaun prezidensial, ita tama fali ba eleisaun lejislativa nian,” hateten eis Prezidente Partidu Sosial Demokratika (PSD) ne’e.
Eis Governador iha okupasaun Indonezia ne’e sujere, antes lei ne’e aprova iha PN presiza estuda didiak, tanba proposta ba lei ne’e mai husi governu.
“Hau rasik lahatene funsaun lei ida ne’e, no asuntu saida mak tau iha ne’eba,maibe hau hanoin presiza tau atensaun duni ba liberdade da imprensa no fo protesaun ba jornalista sira,” Eis Vise Primeiru Ministru ne’e sujere.
“Maibe kuandu aprova lalais lei ne’e, to’o ikus nia rezultadu ladun diak, tanba ne’e partidu PSD inklui partidu opozisaun sira sei fo opiniaun ba lei ne’e”.
Iha fatin hanesan tuir Sekretaria Parlamentu Nasional, Deputada Maria Exposto katak, lei komunikasaun sosial horas ne’e dadauk sei iha Komisaun A no komisaun C maibe sidauk tama iha meja Parlamentu atu diskuti .
“Lei komunikasaun sosial tama ona iha komisaun mais to’o agora ami sidauk hatene nia andamentu ne’e oinsa,” hateten Sekretaria Deputada Exposto.
