Iha konsultasaun ne’e, povu Atoni propoin ba BM hodi tau matan ba dezenvolvementu fiziku iha Distritu ne’e. “hanesan estrada, ponti, fasildade eskola, saneamentu, telekomunikasaun, bolsu estudu ba medisina, centru formasaun professional, hola barku pasagerus foun, uma ba funsinario publiko iha area rurais bolsu estudu especial ba ema vulneravel nia ona sira atu sai matenek,” hateten Reprezentante Povu Oe-Cusse Pasquela Jasmine no Jose Teme Suni, semana kotuk (16/03) iha Distritu.
Iha sorin seluk Padre Parokia Nossa Senhora do Rosario de Fatima Distritu Oé-Cusse, Miguel Arcanjo da Costa, ne’ebé marka prezensa mos, iha konsultasaun ne’e, espera katak ho ajudus husi BM ne’e, se la fo todan ba jerasun foun tuir mai.
‘’Ajudus ne’ebé maka Banku Mundian oferta ida ne’e, ho voluntariamente ka iha loron ikus ita sei selu fali ka lae, presiza klarifika ba povu e ami nia governo promesa saida,” Pe. da Costa duvida.
Hatan ba kestaun ne’e, Reprezentante husi BM Cornelio Carvalho, katak preokupasaun hirak ne’e sei la ses husi planu PEDN nebe Primeiro Ministru halo tiha ona.
‘’Ideas ne’ebe maka ami mai halo konsultasaun iha rai ketan Oé-cusse ne’e, atu ami atrasa planu ba dezenvolvmentu nasaun Timor-Leste, ne’ebe sei bazea ba Planu Estratejiku Dezenvolmentu Nasional ne’ebé foin lalais lansa,” Nia dehan.
Kona ba atu selu fali iha future, tuir Carvalho ekipa Banku Mundial la bele klarifika tanba ne’e kompetensia husi nivel altu nian.
‘’kona ba ida ne’e, hau la bele responde tanba ne’e la’os hau ka ami ekipa ida ne’e nia kompetensia, hau esplika saida maka hau bele ka hatene,” Carvalho tenik.
