Membru Parlamentu Nasional hato’o sentidu kondolensia liu husi plenaria ba Embaixador Korea du Sul, Joao Carascalao nebe fila ona ba Aman Maromak nia kadunan Santu iha Sabadu semana kotuk.
“Bankada Parlamentar hotu-hotu presta ida-idak nia deklarasaun katak, povu Timor senti lakon ninia ema diak ida nebe desde uluk sempre akompania sofrementu povu no mos Fundador Partidu Uniaun Demokratiku Timorense (UDT) hamutuk ho Partidu Fretilin hakarak ukun rasik an,”dehan Deputadu husi bankada Partidu Demokrata (PD), Adriano Joao, iha Parlamentu, semana kotuk, (21/02).
Deputadu Joao dehan, partidu UDT no Fretilin iha objetivu ida deit mak hakarak ukun rasik an maibe ida hakarak ukun rasik an kleur no ida seluk hakarak ukun an lalais.
“Nia mos hala’o servisu iha eksterior hamutuk ho Dr.Jose Ramos Horta,Jose Luis Guteres hamutuk halao ita nia servisu iha Frenti Diplomatika,” dehan Deputadu ne’e.
Nia hatutan, hafoin referendum matebian Joao Carascalao mai fali Timor asumi kargu hanesan Ministeriu Infrastrutura iha tempu UNTAET ninian.
Tuir nia, Joao mate tanba sofre moras, maibe dadauk ne’e nia mos assume kargu nudar Embaisador Timor –Leste iha Korea do Sul.
“Hau reprezentante Partidu Demokratiku ninian (PD) iha Parlamentu Nasional no mos reprezentante povu jeral hato’o ami nia sentidus kondolensia ba matebian no nia familia tomak,” nia hato’o.
Entertantu deputadu Arao Noe husi bankada CNRT hateten, hanesan Timor oan lakon ema diak ida nebe agora dadauk servisu Embaixador iha Korea do Sul.
“Ita lakon ema ida,hanoin ita hotu-hotu tenki hato’o ita nia sentidu Pejimus ba nia no mos ba Familia sira para atu simu esperiensia foun nebe Maromak bolu tia”
Nudar Timor oan lakon lider ida iha momentu 1975 sira hotu-hotu hari partidu oinsa bele lori Timor ba oin.
“Iha problema balun mosu ma ita hatene katak komesa 1975 ita komesa ona harii Demokrasia iha Timor, “ Noe dehan.
Maske iha problema mosu iha 1975 maibe nudar Timor oan bele hare ba violasaun sira nebe akontese iha pasadu maibe konsidera katak Timor oan lakon lideransa ida nebe mak kontribui mos independensia Timor ninian.
Iha fatin hanesan Prezidenti Interino PN ,Vicente Guteres hato’o mos kondolensia ba matebian Joaon Carascalao nebe durante luta ba rai ida ne’e.
“Entermus dezenvolvementu bem estar felisidade ba povu Timor nebe mak hotu-hotu empartikular Enjineiru Joao Carascalao luta ba rai ida ne’e,” Guterres hato’o.
