Relasiona ho ema deskonesidu ne’ebe soe bomba Molotov iha edifisiu Sekretariadu Tekniku Administrasaun Eleitoral (STAE) iha semana kotuk (20/02) madrugada, membru Parlamentu Nasional husu ba polisia atu halo investigasaun ba kazu ne’e tanba ne’e krimi.
“Akontesementu ida ne’e hatudu katak, ita Timor oan nia let inresponsabilidade barak sei iha atu hapara festa demokrasia nebe ita atu hala’o iha 2012 ne’e,” hateten Deputadu Arao Noe, semana kotuk, (21/02) iha PN.
Tuir nia, festa demokrasia nebe sei hala’o iha tinan ne’e importante tebes tanba bele fortaleze Prezidenti da Republika, Governu no Parlamentu.
“Hau hanoin hahalok ida ne’e krime bo’ot ida, tanba ne’e mak husu ba polisia buka evidensia hodi investiga, kaer para hatama ba kadeia atu nune’e bele garante ba estabilidade iha eleisaun presidensial no parlamenntar,” nia husu.
Entertantu Deputadu Faustino dos Santos alias Renan Selak, hateten polisia seidauk halao sira nia servisu ho professional tanba lakonsege kaer ema deskonesidu ne’ebe soe bomba ba edifisiu STAE ne’e.
“Ema bele provoka situasaun ita la hein maibe liu-liu Polisia tenki halo investigasaun hodi identifika se mak soe Bomba iha STAE tanba harii instituisaun polisia ne’e, estadu selu ho povu nia osan, entaun sira tenke mantein durante 24 oras nia laran,” nia katak.
Renan lamenta, tanba sa ema soe Bomba iha instituisaun publiku nia oin Polisia la hatene fali.
“Hau fiar katak, Polisia mantein hanesan ne’e situasaun ema bele provoka nafatin,” Deputado Renan esperansa.
Nia sujere ba Polisia oinsa bele hasai hotu kareta sira nebe mak halai iha Dili laran ho vidru reven tenki hasai hotu.
“Atu tama iha Eleisaun se deit mak lao ho Kareta vidru tenki hatun hotu para ita bele hatene,selae ema laran at bele provoka situasaun ida nebe ita lagosta”
Atu garante festa demokrasia la’o ho susesu polisia tenki kontrola maka’as atu nune’e labele mosu situasaun oi-oin nebe ema hotu la gosta.
Iha fatin hanesan Deputadu bankada Fretilin Inacio Moreira iha nia intervensaun husu ba sidadaun hotu-hotu liu-liu ba ukun na’in sira atu labele hanoin at ba rai ida ne’e.
“Tanba deit eleisaun besik ona halo ameasas ne’e lalos, diak liu hakmatek tiha deit, husik povu mak desidi,” Deputado Moreira informa.
Nia husu labele ameasas malu hanesan fali ho terorista, soe bomba tun sae kona ba saida nian.
“Husu ba ukun na’in sira lalika hanoin buat sira ne’e, hakmatek husik povu mak desidi atu nune’e nasaun ida ne’e la’o diak ba oin hanesan Demokratiku hanesan mos nasaun sira seluk iha mundu rai klaran,” nia tenik.
