Relasiona ho tarifa mikrolet ne’ebe agora selu $0,25 kada pasajeiru ida (publiku) no estudante selu 0,10, tuir Staf Senior Traffic Light Diresaun Nasional Transporte Terestres (DNTT) Joao Eugenio C. da Silva katak DNTT seidauk fo sai tarifa ne’ebe tuir standard lolos.
Tuir nia, tarifa ne’ebe agora aplika ba pasajeiru sira ne’e, impaktu husi krizi folin mina sa’e iha 2011 e to’o agora seidauk iha mudansa maske parte DNTT hato’o ona ho Ministeriu Infra-estrutura kona ba asuntu ne’e maibe laiha rezultadu.
“Koalia verbal deit, dehan ba eskola oan nafatin 10 sentavus, ba pasajeirus normal sira ne’e selu 25 sentavus mas ate agora surat ida la iha,” dehan da Silva semana kotuk (17/02) iha Balide, Dili.
Nia hateten, to’o agora kondutor mikrolet sira ejiji hela deit ba DNTT hodi fo surat legal kona ba tarifa ninian maibe husi ministeriu kompetente sidauk despaisu surat.
“Nebe ami mos koalia ho ibun deit, husi ministeriu hateten ba ami, e ami hateten ba sira surat la iha,” nia katak.
Entretantu tuir Deputadu Agustu Tara katak, atu iha balansu entre pasajeiru ba-bain ho estudante sira, estudante tenke selu 15 sentimus.
“Problema mak ne’e, mikrolet sira hasa’e folin tanba problema iha mina sa’e, agora Governu mak tenki estuda hare oinsa mak ita bele tarjetu ba mikrolet sira,” dehan Tara.
Alende ne’e tuir nia, Timor-Leste adopta merkadu livre no ema halo tuir konforme sira nia hakarak deit.
“Mas tuir hau nia hare mikrolet sira ita fo 10 sen, fo 15 sen sira la manan buat ida tanba agora folin mina karun teb-tebes, no atu tun fali difisil,” Deputadu ne’e dehan.
Tanba ne’e nia parte husu ba governu oooinsa mak atu define lolos tarifa mikrolet nian.
