“Aprende husi esperiensia pasadu iha tinan 2006 atu ita nia maluk sira, ita nia nai ulun sira, membrus sira iha PNTL no F-FDTL bele asegura katak knar nebe sira halo tuir duni buat nebe istipula iha sira nia knar no iha sira nia institusaun nian. Sira bele sai institusaun nebe kaer lei no ordem, ida ne’e maka ita hakarak” dehan Rede Feto Presidente Oliveira iha Sede CAUCUS, Dili, foin lalais (08/03).
Nia mos apela tan katak, durante ne’e Rede Feto hare katak atensaun ba feto ne’e sei menus, nune mos Rede Feto espera katak ho mensagen ba paz no mensagem nebe maka Rede Feto hato’o no sosiedade tomak hato’o ba nai ulun sira iha PNTL no F-FDTL bele fo liu atensaun para bele hadok aan husi violensia atu proteze feto no labarik diak liu tan.
Iha biban hanesan Filomena Reis nudar Aktivista ba Paz no Justisa hatoo mos mensajem hanesan.
“Husu ba PNTL no F-FDTL sira no Siguransa Sivil sira katak importante tebes halo prevensaun para labele iha intimidasaun ba feto, no para labele iha violensia hasoru feto, liu-liu feto sira nebe hela iha areas remotas. No feto sira nebe maka sai hanesan fiskais sira bele livre atu lao’o. No husu ba PNTL sira no F-FDTL atu tau atensaun masimu,” dehan Aktivista Reis iha okaziaun hanesan.
Nia haktuir tan katak wainhira siguransa iha rai laran lao diak entaun feto sinte seguru no hakmatek no povu tomak liu-liu feto sinte haksolok no fiar katak iha duni siguransa ne’ebe maka garantia duni sira nia seguransa no feto sira bele kontribui ba nasaun ida ne’e.
