“Ami agora prepara hela politika nasional kona ba difisiente nian se aprova iha fulan ida ne’e ami sei halo lansamentu ba futuru responde ba dificuldade ne’ebe maluk difisiente sira iha bazeia ba politika nasional ne’ebe iha tanba iha fatin barak mak inan aman sira izoladu liu no balun mos kultura entau sira nia oan ho kondisaun difiseinte lakohi fo atensaun ami sei esforsu nafain kopera ho entidade hotu atu fo tulun ba difisiente sira iha rai laran,” hateten Sekretariu Estadu Asistensia Sosial no Dezastre Naturais (SEASNA) Jacinto Rigoberto, semana kotuk (17/02) iha Centru Convensoens Dili.
Tuir SE. Rigoberto, politika nasional ida ne’e importante tanba numeru ema difisiente kontinua aumenta bazeia ba sensus uma kain ne’ebe durante ne’e halao hanesan iha sensus uma kain tinan 2004 ema ho kondisaun defisiente hamutuk rihun 12,sensus uma kain 2010 aumenta hamutuk 48. 000 resin.
Nia hatutan,, tuir dadus ne’ebe iha, balun hetan difisiente tanba asidente ruma no balun mos moris mai ho kedas kondisaun difisiente.
“Ne’e dadus jeral e ami sei esforsu atu rekolla dadus ne’ebe detailla konaba difisiente liu husi programa rejisto uniku vulneravel nian atu identifika lolos dadus sira ne’e,” nia katak.
Sekretariiu Estadu rekoinese katak ihadifisente balun mak seidauk hetan apoiu husi governu maibe barak mak hetan ona hanesan sira ne’ebe invalidez katak ho kondisaun difisiente grave hamutuk 5.000 resin kada fulan sira simu US$30,00.
Maibe ba sira ne’ebe la tama iha kategoria invalidez , sei fo apoiu liu husi instituisaun 12 ne’ebe iha hanesan Asosiasaun Hi’it Ema Ra’es Timor (ASSERT) no seluk tan.
Iha lidun seluk Diretor Fundasaun Klibur Domin (FKD), Joaquin Soares hateten planu ne’e diak maibe presiza kria mekanizmu ne’ebe diak liu tan hodi implementa programa ne’e.
“Diak mak ita iha ona Esbosu Politika Nasional ba Difisiente nian ne’ebe agora dadaun iha ona faze final atu submete ba iha Konselhu Ministru atu hetan aprovasaun maibe ita lahatene ho tempu ne’ebe limitadu no se hetan aprovasaun nia implementasaun oinsa ne’e mak ami nia preokupasaun,” dehan Soares.
Nia hatutan katak nudar sosiedade Sivil ne’ebe durante ne’e fo asistensia ba ema difisiente sira sei esforsu maka’as atu kolabora ho MSS atu ratifika lalais konvensaun nasional direitu ema difisiente nian tanba konvensau ne’e importante tebes nune’e governu bele tau matan ba ema difisiente sira no atu protese direitu difisiente.
“Se mandatu governu ida ne’e hotu mak politika ne’e konsege aprova duni ita laiha garantia ba governu foun atu implementa tanba ne’e politika deit komitmentu governu foun nian bele mos laimplementa maibe tau fali iha meja okos tanba ne’e laos kestaun prioridade ba sira, maibe nudar sosiedade sivil nafatin supporta no inkoraja governu foun ne’ebe iha atu hare asuntu difisiente ne’e tenke klaru,” Soares preokupa.
