“Ami sei halo preparasaun didiak lai, preparasaun fo formasaun ba formador sira, sosializasaun tenki barak tan, tanba komunidade barak mak seidauk komprende diak kona ba liafuan ne’e, ” dehan Asesor Caet, semana kotuk (28/02)iha nia knar fatin Vila Verde, Dili.
Tuir Asesor Caet, nia parte presiza fo formasaun ba professores sira no halo sosializasaun iha baze depois sente ba diak ona mak bele halo lancamentu ba lian materna ne’e.
Caet hatutan, kona ba bainhira mak atu halo lansamentu, seidauk determina e oras ne’e dadaun sira mos halo survey hodi rekolha dadus iiha Distritu sira.
“Lolos halo lansamentu iha 21 Fevereiru foin lalais ne’e tanba ne’e loron internasional lian materna maibe kansela tiha tanba seidauk iha preparasaun ne’ebe diak,” nia katak.
Alende ne’e, iha ema barak mak seidauk no kontra kona ba planu ida ne’e.
“Hau hare Amo Bazilio nia komentar tanba sa mak lian materna urjente ba Timor-Leste tanba kualidade educasaun seidauk la’o ho diak maske ema barak tama ba escola maibe barak la konsege remata e barak mos hetan rezultadu ne’ebe la dun diak e konserteza iha factor barak ne’ebe kontribui ba ida ne’e,” Asesor Caet tenik.
Iha parte seluk membru Parlamentu Nasional husi Bancada Frente Revolusionario Timor Leste (FRETELIN) Deputadu Inacio Moreira hateten diak liu lalika implementa lian materna tanba kria konfuzaun deit iha Timor-Leste.
“Fatin laiha atu implementa lian materna ne’e rasik tanba lian sira ne’ebe mak konsagra ona iha konstituisaun RDTL mak Inglesh, Portugues, Indonezia no Tetun,” Deputadu Moreira kontra.
