Tuir Vise Prezidente Komisaun F Parlamentar, Deputadu Francisco Jeronimo katak maske Primeiru Ministru esplika ona katak vantajen uza lian maternal atu fasilita interasaun entre profesores no alunos sira iha prosesu aprendijazen maibe kuandu tama ona iha kurikulum, tenke halo avaliasaun.
“Atu fasilita deit labarik sira iha prosesu aprendijazen atu sira komprende Tetun no Portugues la’os problema maibe kuandu tau ketak ona hanesan parte ida ne’ebe atu introdus lian balun ne’e mak lalos,” preokupa Deputadu Jeronimo, semana kotuk (15/02) iha Uma Fukun Parlamentu Nasional Dili.
Tuir Deputadu ne’e katak bainhira lian ne’e tama iiha kurikulum mak Parlamentu sei la simu tanba la’os ona atu fasilita maibe tenke halo avaliasaun ba lian ne’e.
“Tanba atu uza lian hanesan fasilita entau iha Lospalos mos bele tanba Makasa’e no lian sira seluk mos bele uza maibe ida ne’e la akontese. Esplikasaun Primeiru Ministerio nian ami la tau kestaun tanba se atu halo ida ne’e bai-bain ema halo hela la presiza tenki halo iha material ruma atu tau fali iha kurikulum,” Deputado Jeronimo kestiona.
“Maibe kuando tau ona iha kurikulum tenki avaliasaun, tenki prepara ema, professores iha atu hanorin para ketak duni ba ida ne’e,” nia sujere.
Iha parte seluk Porta Voz Sindikatu Professores Timor Leste (SPTL) Agostinho Soares husu ba Ministeriu Edukasaun (ME) atu dezenvolve uluk lian Tetun duke lian maternal.
“Ami nia hanoin diak liu mak dezenvolve uluk lai lian Tetun atu nune’e bele hametin independensia iha ita nasaun Timor Leste ,” sujere Porta Voz SPTL Soares.
Entertantu hatan ba preokupasaun hirak ne’e, Sekretariu Estadu Konselhu Ministru (SEKM) Hermenegildo Pereira, nudar Porta Voz Governu nian hateten Primeiru Ministru Kai Rala Xanana Gusmao koalia katak uza lian maternal atu fasilita interasaun entre profesores no alunus sira durante prosesu ba hanorin no aprendizajen.
“Bainhira ita aplika lian materna, ita fo kondisaun ba labarik sira aprende didiak no fasilita interesaun entre alunus no professores, alunus no alunus, alunus no Komunidade,” dehan Primeiru Ministru.
NIa dehan tan, lian materna uza iha fatin ne’ebe la koalia lian Tetun no Portugues ba labarik sira nune’e bele partisipa ativu liu iha escola bainhira sira hanesan sujeitu iha prosesu aprendizasen no la’os deit objectu iha aprendizasen.
