Tuir Diretor Escola Sekundaria Nicolau Lobato Tasi Tolu, Marcos S. Pacheco, maske Ministerio Educasaun aumenta tan materia foun Geolojia ba iha ensino secundario hotu maibe realidade livru ba materia ne’e rasik laiha e obriga Professores sira hanorin tuir sira nia esperiensia deit.
“Ami implementa ona maibe Professores sira ne’ebe atu hanorin kona material ne’e mos laiha inklui mos livru laiha ,” dehan Diretor Pacheco, foin lalais (07/02) iha nia knar fatin Tasitolu, Dili.
Tuir nia, material foun hat ba iha estudante siensia sosiais iha primeiru ano mak siensia sosiais, teknolojia multi media, sidadania no mos dezenvolvementu social enkuantu ba siensia naturais aumenta tan material geolojia.
“Husi Educasaun Regional Dili dehan livru ba ida ne’e iha ona maibe to’o agora livru sira ne’e seidauk ditribui ba escola ida ida atu bele hanorin ba estudante sira,” nia kestiona.
Entertantu Vise Prezidente Komisaun F Parlamentar, Deputadu Francisco Jeronimo hateten ne’e responsavel Ministeriu Edukasaun nian tenke prepara livrus ba profesores sira nune’e bele uza ba hanorin.
“Ita tenki referensia ida ne’ebe fiksu hanesan livru sira ne’e, agora hanorin tuir esperiensia ne’e los tamba Professores sira iha esperensia barak atu hanorin maibe nia tenki iha livru para sai mata dalan ba nia atu hanorin ,” Deputadu ne’e dehan.
