Relasiona ho loron eleisaun presidensial ne’ebe besik dadaun no maioria estudante ne’ebe estuda iha capital Dili barak mak iha kartaun eleitoral husi Distritu, Reprezentante husi Kandidatu Presidente da Republika Francisco Guterres Lu-Olo, Josefa Alvares Soares sujere ba Sekretariadu Tekniku Administrasaun Eleitoral (STAE) atu mobiliza estudante hirak ne’e bele tuir eleisaun iha sira ida-idak nia Distritu.
“Estudante sira iha Dili laran, barak mak sira nia kartaun eleitoral husi foho nian e defisil oituan bainhira atu mobiliza sira ne’e ba iha foho entaun presiza atensaun husi STAE oinsa mak mobiliza sira,” sujere Josefa Alvares Soares, semana kotuk,(09/02) bainhira akompanha KaPrez Lu-Olo enkontru ho STAE iha Kaikoli, Dili.
Atual Deputada ne’e hatutan, estudante sira mos iha direitu atu tuir votasaun no difisil ba sira atu hetan transporte bainhira besik eleisaun.
Tuir nia, STAE tenke halo kordenasaun ho xefe Eskola sira, semana ida antes tama eleisaun tenke fo feriadu ba nune’e sira labele lakon sira nia direitu ba votu.
“Selae ita to’o iha loron mak ita ba hotu ba rame-rame transportes mos susar la halimar atu bele fasilita ema sira ne’e ba ejersa sira nia direitu,” nia sujere.
Entertantu Diretor Jeral STAE, Tomas Cabral hateten asuntu ne’e sei hato’o ba iha Xefe Estadu nune’e bainhira besik ona eleisaun eskola sira tenki feriadu.
“Tanba ami loke 01 de Junhu ate 15 de Dezembru katak, ema nebe hakarak muda nia hela fatin ba votasaun nia tenki troka eleitoral iha loron ida fulan Junhu to’o loron sanulu tresin lima fulan Dezembru 2011 maibe durante ne’e sira lakohi halo ida e lista ami taka tiha ona,” hateten Diretor Cabral.
Nia haktuir, populasaun iha Dili barak mak husi foho no muda sira nia kartaun eleitoral hamutuk ema nain 50.000 resin e lei fo dalan para ema bele muda nia kartaun eleitoral.
“Mais ami sei hato’o ba Primeiru Ministru no Prezidenti da Republika para informa ba impresa sira hotu tantu eskola antes dia 17 tenke feriadu, dia 15 Marsu hanesan ne’e bele feriadu para sira bele ba foho hato’o sira nia direitu votu,” nia katak.
Nia dehan,eskola sira tenki feriadu duni tanba eskola sira ne’e hotu sei uza ba sentru votasaun nian.
“Ami prepara ona atu hato’o ba Ministeriu Edukasaun para husu ba Xefi Suku sira eskola sira ahi bele ativu fila-fali,” nia tenik.
