Tuir Diretor Nasional do Empregu (DNE) iha Sekretariu Estadu Formasaun Profesional e Empregu (SEFOPE), Paulo Alves, hateten ba joventude ne’ebe hakarak tuir formasaun iha Sentru Formasaun Profesional (CFP) tenke iha kartaun evidensia husi SEFOPE.
“Kartaun evidensia ne’e importante tebes ba joventude sira katak antes sira ba servisu iha ne’ebe ami bele identifika liu husi kartaun evidensial tanba kartaun evidensial ne’e iha dadus ne’ebe kompletu kona ba identidade ema ida nian. No ita bele hatene baze de dadus lolos hanesan ema nain hira mak buka servisu iha rai laran, rai liur, formasaun professional no aktividade negosiu. Se ita la estabelese kartaun evidensial difisil ba ita atu identifika,” dehan Diretor Alves, semana kotuk (06/02) iha nia knar fatin Kaicoli, iha Dili.
Diretor Alves hatutan total joventude dezempregu ne’ebe hetan ona kartaun evidensial hamutuk 21.000 e sira bele asesu ba iha Sentru Formasaun hirak ne’ebe eziste iha rai laran.
Iha lidun seluk Joventude dezempregado Juvinal Sarmento, konkorda ho mekanismu ida ne’e, nune’e bele identifika joventude desempregu sira ne’ebe buka servisu no hakarak asesu ba iha formasaun professional.
“Mekanizmu ne’ebe diak tebes tanba bele ajuda ami joventude sira hodi hetan servisu lalais no ita mos bele hatene dezempregu iha Timor-Leste ne’e na’in hira mak servisu ona no na’in hira mak seidauk hetan servisu,” nia apoia.
Diretor Alves informa tan katak kada loron DNE fahe formulario ba joventude hamutuk 100 resin e barak mak susesu ona iha formasaun hanesan kursu lian Korea atu koko ba servisu iha Korea do Sul; no lian Ingles atu ba servisu iha Australia.
