Tuir Diretor Jeral Sekretariu Estadu Formasaun Profesional e Empregu (SEFOPE), Jacinto Gusmao, katak SEFOPE sei loke Sentru Formasaun Profesional (SFP) iha Distritu hat kona ba lian Korea nian nune’e joventude sira iha distritu mos bele asesu ba kursu ne’e.
Diretor Gusmao hato’o kestaun ne’e relasiona ho ezijensia husi Governu Korea du Sul, bazea ba akordu ne’ebe assina entre nasaun rua, kona ba numeru trabalhadores Timoroan ne’ebe ba servisu iha ne’eba seidauk atinji targetu.
“Kada tinan ita tenke haruka trabalhadores hamutuk 2.500 maibe Timor-Leste seidauk atinji numeru ne’ebe iha tanba joventude barak mak la partisipa iha formasaun lian Korea ho ida ne’e Sekretario Estado hamosu planu iha tempu besik sei loke tan Sentru Formasaun Lian Korea iha Distritu hat atu kapasita kapasidade Joventude iha Distritus sira atu asesu mos ba formasaun ne’e atu bele responde ba numeru ne’ebe governu Korea husu,” hateten Diretor Gusmao semana kotuk (08/02) iha Kaikoli Dili.
Tuir nia, numeru trabalhadores Timoroan iha Korea du Sul foin mak atinji 600 resin deit tanba ne’e nia parte halo ona kordenasaun ho Administrador Distritu iha Distritu hat ne’e no planu ne’e rasik sei realiza iha fulan Marsu 2012.
Distritu hat ne’e mak Bobonaro, Oe-cusse, Same no Distritu Baucau. Enkuantu tekniku sira husi Korea do Sul iha ona Dili no orsamentu mos preparadu ona.
“La’os atu ba sai atan ba ema maibe atu kapasita joventude Timoroan sira hodi aprende dezenvolvimentu nasaun seluk nian alende hetan osan sira mos bele fahe fali ba joventude sira seluk ne’ebe lahetan oportunidade ba servisu iha Korea do Sul,” nia katak.
Iha parte seluk Administrador Distritu Manatuto, Gaspar da Silva, apresia ho planu ida ne’e nune’e joventude iha Distritu sira mos bele asesu ba iha formasaun ida ne’e.
“Ami autoridade local konkorda tebes ho politika ida ne’e atu loke sentru treinamentu Lian Korea iha distritu ne’e kapas tebes tanba signifika katak kapasita ita nia joventude sira nia kapasidade bainhira hetan oportunidade atu ba servisu iha estranjeiru. SEFOPE tenke realiza lia fuan ne’ebe sira fo sai, labele koalia deit, “ Administrador da Silva dehan.
Nia hatutan, se planu ne’e realiza duni sira pronto atu oferese rai hodi bele harii Sentru Formasaun Professional Lian Korea nian ba joventude sira iha Distritu Manatuto.
