Atu membru Polisia Nasional Timor-Leste (PNTL) sira komprende separasaun entre vida military no sivil, Fundasaun Mahein (FM) rekomenda ba instituisaun ida ne’e atu hasa’e edukasaun sivika ba sira nia membru iha academia polisia nian nune’e sira bele komprende didiak.
Tuir Diretor FM, Nelson Belo katak realsiona ho besik ona eleisaun, importante ba membru PNTL sira ne’ebe hakarak atu tuir votasaun tenke hatene funsaun nudar ajente seguransa no ema sivil.
“Presiza duni halo edukasaun sivika ba sira nune’e sira bele komprende no halo separasaun entre vida militar no sivil,” Diretor Belo katak.
Hatan ba preokupasaun hirak ne’e, II Komandante Policia Nasional Timor-Leste (PNTL) Superintendente Afonso de Jesus dehan kona ba separasaun de poderes hatur ona iha konstituisaun no lei organiku kada instituisoens define ona iha ne’eba.
“Hau hanoin separasaun de poderes ne’e iha lei konstitusaun no lei organiku kada institusaun ne’e iha definisoens kona ba separasaun de servisu, koalia mos kona ba kordenasaun de servisu oinsa maka bele fo apoiu ba malu iha area nebe deit,” dehan Segundu Komadante de Jesus, semana kotuk (03/02), iha Kaikoli,Dili.
Nia hatutan, hasa’e edukasaun sivika ne’e membru hotu-hotu hatene, tantu educasaun sira ne’e kada PNTL, kada institusaun oinsa mak atu bele desimina informasaun liu husi seminariu, liu husi formasaun para sira hotu-hotu bele kunhese.
“Fiar katak komandante sira, ema hotu-hotu nebe servisu, sira tenki haka’as an atu aprende kona ba sira nia knar no sira nia responsabilidade,” nia esperansa.
Entertantu Prezidente Komisaun B Parlamentar, Deputadu Duarte Nunes hateten bainhira iha recrutamentu foun, sira iha teoria fulan tolu.
“Karik sira aprende buat sira ne’e hotu, aprende Direitus Humanu, inklui mos separasaun de poderes. Sira aprende hotu depois mak ba pratika e sira sei estajiu iha Instituoens sira ne’e antes sai polisia permanente,” Deputadu Nunes katak.
Tuir deputadu ne’e, edukasaun sivika tama ona iha kurikulum treinamentu polisia ninian, no implementasaun edukasaun ne’e la’o dadauk, hanesan mos ba recrutamentu ba polisia foun nebe mak atu recruta fali implementsaun edukasaun ne’e validu ba sira hotu.
