Relasiona ho fasilidade iha eskola barak iha rai laran mak lakon, Membru Parlmamentu Nasional, Deputadu Aderito Hugo, sujere ba Ministeriu Edukasaun (ME) atu monta seguransa iha eskolas atu nune’e sasan sira ne’ebe tau iha eskola bele seguru.
Hatan ba sujestaun hosi Deputadu Hugo, Ministru ME, Dr. Joao Cancio Freitas katak ne’e depende ba Diretor eskola sira.
“Diretor da Escola mak tenki jere, atu ba halo saida ne’e Diretor da Escola mak tenki jere,” katak Ministru Freitas semana kotuk (06/02) iha Parlamentu Nasional, Dili.
Tuir nia ME transfere ona osan ba Diretores sira no sira mak tenke halo planu oinsa mak atu ezekuta osan ne’e tuir diskrisaun ne’ebe iha.
Entretantu tuir Deputadu Hugo katak kondisaun eskola iha teritoriu tomak kuaze ke aat hotu no la permiti atu rai fasilidade eskola nian.
“Meza kadeira sira ne’e tau iha sala ne’ebe laiha odamatan no janela no komunidade sira ne’ebe hela besik ka ema ne’ebe presiza iha situasaun saida deit sira bele lori tanba laiha seguransa iha escola,” dehan Deputado Hugo.
Iha parte seluk Secretariu Jeral Sindikatu Professores Timor-Leste (SPTL) Francisco da Conceicao da Costa hateten monta seguransa iha escola ne’e desizaun husi Komisaun Funsaun Publika (KFP) tanba sira mak halo rekrutamentu ba funsiunariu foun.
“Hau hanoin presiza tebes duni tanba dala ruma escola sira ne’ebe laiha odamatan no janela sira bele ba foti ka na’ok,” nia dehan.
Enkuantu tuir Deputadu Francisco de Araujo katak komunidade balun laiha komprensaun no buka estraga fasilidade eskola nian.
“Balun na’ok ten, nakar ten sira ba estraga escola, tuda vidru rahun hodi foti meja-kadeira,” nia haktuir tan.
“Komunidade balun impresta tiha meza-kadeira bainhira sira uza tiha balu fo fila fali, balun la fo fila ida ne’e mak ba oin tenki tau orsamentu atu fo seguransa ba escola atu nune’e sira bele tau matan ba escola sira ne’e. Ba 2013 tenki tau nafatin atensaun ba asuntu ne’e,” Deputadu de Araujo sujere.
