Estudante husi Eskola Ensino Baziku 05 Comoro semana ida tama eskola dala rua deit tanba konstrusaun ba eskola ne’e seidauk remata.
Tuir Koordenador Eskola Filial Primeiru no Segundu siklu No. 05 Comoro, Joao Pereira Madeira katak lolos kompanha Riri Star remata no entrega ba parte eskola nian iha 31 Dezembru 2011 maibe relaidade to’o agora seidauk remata.
“Obriga ami nia estudante sira tenki tama escola semana ida dala rua tanba salas la to’o. Tuir planu kompanhia entrega ba eskola iha dia 05 Fevereiru tinan ne’e,” hatete Kordenador Joao Perreira Madeira semana kotuk (27/01) iha Comoro Dili.
Koordenador Madeira dehan eskola ne’e iha deit salas ualu enkuantu total estudante hamutuk 2.188 no ho realidade ida ne’e impede labarik no profesores sira atu hala’o prosesu aprendijazen.
“Kuandu konstrusaun remata no entrega ona mai ami, ami sei fahe alunus sira kada sala nain 15, dader no meudia,” nia katak.
Nia informa, alende ne’e sira mos sei menus profesores no presiza tan profesores nain 5, falta de livrus Portugues, siensia, meza-kadeira inklui mos kuadru hakerek (papan tulis).
Hatan ba kestaun ne’e Diretor Nasional Ensino Baziku, Alfredo de Araujo katak atu labarik sira labele lakon sira nia direitu ba prosesu aprendizajen, tenke buka dalan alternative buka sala provizoriu ida.
“Konsekuensia mak tenki redus ona oras lectivas ne’ebe lolos atu enkoraja tempu aprendizasen ho efectivas ne’e 04:00 ou 05:00 bele redus mai 01:00 ou 02:00 oras de tempo de aprendizasen,” dehan Diretor de Araujo.
