Atu hasa’e konesementu no kapasidade lideransa nian, Forum Organizasaun Non Governmentais Timor-Leste (FONGTIL) fo treinamentu ba lideransa komunitaria feto iha Distritu neen iha rai laran.
“Ami servisu hamutuk ho UN Women para oinsa mak fo treinamentu ba maluk feto sira no enkoraja sira hasa’e sira nia kunesementu atu nune’e sira bele partisipa iha vida politika. Hanesan iha inkontru ruma sira bele iha korajem, sira bele iha kunesementu nebe maka diak atu bele para koalia iha publiku e mos oinsa sira bele foti desizaun iha enkontru ruma no reniaun iha nivel suku,” hateten Jose Amaral, Cordenador Advocasia FONGTIL, semana kotuk (07/02), iha Kaikoli, Dili.
Tuir Cordenador Amaral treinamentu ne’e hala’o iha Distritu neen: Baucau, Viqueque, Aileu, Bobonaro, Suai no Ermera. Iha Distritus neen ne’e iha 10 mak sira nia lideransa komunitaria feto.
Nia dehan objetivu prinsipal husi treinamentu ne’e mak atu hasa’e kapasitasun maluk feto no mos dudu maluk feto sira ne’e atu sai feto ne’ebe maka iha potensia atu bele mos involve iha nivel politiku no setor oi-oin.
Entertantu Program Manager CAUCUS Feto iha Politika, Paula Corte Real Araujo, hateten objetivu husi treinamentu mak oinsa atu enkoraja feto sira uza sira nia direitu atu involve aan iha vida politika no iha kualker atividade.
“Ami fo motivasaun ba feto sira atu oinsa uza sira nia direitu hanesan sidadaun atu partisipa iha vida politika no mos qualker aktividade, hanesan halo seminariu, workshop e ami halo treinamentu kona ba lideransa transformativa,” Program Manager Araujo dehan.
Nia haktuir tan katak, dala barak ita nia maluk feto sira mos balu sei hanoin katak Partidus Politikus ne’e mane deit maka iha laran, ne’e duni Rede Feto (RF) iha bulletin nebe maka fahe ba publiku atu nune’e maluk feto sira mos bale hatene kona oinsa sira nia direitu atu asesu ba politika.
“Oinsa para sira bele fiar aan atu involve iha parte politika no parte seluk-seluk tan. Ne’e duni liu husi aktividade hirak ne’e no buletin sira ne’e luta ba maluk feto sira atu labele tauk no moe atu hakat ba oin,” nia enkoraja.
