Hahu iha loron 21-25 Fevereiro 2011, Ministerio Justisa (MJ) liu husi Diresaun Registu Sivil e Notariaodo (DRSN), servisu hamutuk ho organizasaun Nasoens Unidas ba Fundu Labarik Nian (UNICEF) inklui Lideransa Komunitaria iha rai laran tomak halao kampanha ba registu kosok oan hahu husi 0-5 anos hodi hetan Sertidaun Moris Repulica Democratika Timor-Leste (RDTL).
Iha semana kotuk (31/01) Diresaun Nasional Registu Sivil e Notariado hahu distribui ona Sertidaun Moris RDTL ba Xefi Sucu sira iha distritu Oé-Cusse.
Diretora Nasional Registu Sivil e Notariado, Maria Do Rosario Fatima Castro, hafoin serimonia entrega sertidoes hateten katak intensaun prinsipal presensa iha rai ketan Oé-Cusse hodi enseramentu (taka) ba registu moris nian ne’ebé hahu halo kampanha iha loron 2-25 fevereiro 2011 no oras ne’e tama ba fase distribuisaun nian.
“Amia nia partisipasaun iha ne’e atu halo distribuisaun Sertidoes Moris ba kosok oan sira, ba kada suku, ne’ebé maka ami halo rejistu iha tinan kotuk,” Diretora Castro hateten tan.
Nia hatutan tan katak total labarik iha teritorio laran, ne’ebe maka konsege rejistu hamutuk 63,317 enkuantu iha Distritu Oé-Cusse konsegue rejistu 3,145 feto no mane iha sucu sanulu resin walu nia laran.
Iha parte seluk Xefi Suku Usi Taqeno Vicente Falo orgulho ho esforsu governo nian tamba konsege tulun komunidade hodi halo sertidaun moris RDTL nian iha sira nia le’et no la presiza ona atu tun ba to’o kapital Oé-Cusse no gasta ossan transporte no akomodasaun ne’ebé karun tamba deit atu hetan Sertidaun Moris ba kosok oan sira.
“Ami nudar povu nia liman ain sinti kontenti tebes ho governo ida ne’e iha plano ne’ebe halo tiha ona Rejistu Moris iha ami nia sucu ne’ebé dok tebes husi kapital Oé-Cusse ho esforsu ne’e hamenus ona povu difkuldade ba selu tranporte ba mai,’’ hateten Xefi Falo.
