Tuir organizasaun non governmental Forum Tau Matan (FTM) esbosu Lei Justisa Juvenil agora daudaun sei iha prosesu analiza ba kontiudu lei husi Ministerio Solidaridade Sosial (MSS) bainhira atu submete ba iha Konselho Ministru hodi hetan aprovasaun.
“Esbosu Lei Justisa Juvenil seidauk tama iha Konselho Ministru. Agora daudaun sei iha Ministerio Solidaridade Sosial) atu halo analisa no hare kontiudu lei atu lori ba iha Ministerio Justisa atu haruka ba iha Konseilho Ministru hodi bele hetan aprovasaun tanba lei ne’e inportante tebes atu proteje labarik sira,” dehan Assisten Programa Protesaun Labarik, Honorio Soares Almeida, semana kotuk (03/02) iha knar fatin, Kaikoli, Dili.
Nia hatutan katak esbosu lei rua hanesan Lei Justisa Juvenil no Kodigu Labarik ne’e inportante tebes atu proteze labarik ne’ebe involve iha krime todan.
Durante ne’e sira akompania nia prosesu kuaze tinan hat ka lima ona maibe laiha rezultado final no sira mos seidauk hatene (MSS) halo ona analisa ba kontiudu esbosu lei ne’e ka seiduak tanba MSS mak sei implementa bainhira esbosu lei ne’e hetan aprovasaun.
Tuir FTM esbosu lei ne’e Ministerio Justisa haruka ba iha MSS kleur ona.
Iha okaziaun ne’e mos FTM rekomenda ba MSS atu halo analisa didiak ba kontiudu lei ne’e nune’e labele afeta ba labarik sira bainhira halo implementasaun iha futuru.
Iha parte seluk, Komisaria Komisaun Nasional Direitu Labarik (KNDL), Adalgiza Ximenes Magno, hateten katak MSS sai mos implementador lei ne’e ba future.
“Tuir informasaun ikus ne’ebe hau hetan katak agora dadaun esbosu lei ne’e sei hein apresiasaun ida husi Ministerio Solidaridade Sosial nune’e bele submete iha Konselho Ministru hafoin halo diskusaun ba esbosu ne’e no sei submete iha Parlamentu Nasional atu debate nune’e mos sei hein promolgasaun husi Presidente da Republika. Sei iha prosesu ne’ebe naruk,” dehan Komisaria KNDL Magno.
Bainhira TDW koko atu konfirma ho parte Ministerio Solidaridade Sosial liu husi Sekretario Estado, Jacinto Rigoberto, no Xefe Diresaun Justisa Juvenil maibe lakonsege tanba laiha fatin atu koalia ba media.
