Fungsionario publiko (FP) iha Distritu Oé-Cusse latementa ho sistema pagamentu ba sira nia salariu fulan fulan tanba dala barak atraza to’o semana ida maibe pior liu mak tenki forma no dudu malu iha loron manas no iha udan laran fulan fulan.
Domingos Pereira nudar membro Unidade Patrulha Frontera (PNTL-UPF) semana kotuk (31/01) lamenta tebes ho sistema pagamentu ne’ebé maka ikus ikus ne’e sira infrenta.
“Hau pesoalmente lamenta tebes ho sistema selu ami nia salario ne’e. Ami laos pengemis maka forma iha loron manas laran, udan subiska ne’e. Hau ema sigurasa imi tetu tok ne’e diak ka lae. Kasian liu tan fungsionario husi Saúde sira tenke husik hela serbisu servi pasinete depois mos guru sira la hanorin. Ne’e persiza nai ulun sira tau matan,” hateten Ajente UFP Pereira.
Atu hetan sira nia pagamentu fulan-fulan funsionarius publikus hotu presiza foti sira nia ossan liu hosi Banco Nasional Comersio Timor-Leste (BNCTL), Sukursal Oé-usse.
Entretantu kordenador Siguransa Sivil Oé-Cusse, Maritu De Araujo, hateten sistema pagamentu ne’ebé maka selu fungsionario sira ladun diak.
Nia sujere ba oin presiza hadia tanba knar banku ne’e atu hafasil la os atu difikulta fali pagamentus ba funsionario sira.
“Ne’e iha dignidade laos mai hamrik iha loron manas laran depois forma taka tiha dalan publiko ne’e,” hateten Kordenador de Araujo.
Waihira TDW tenta halo konfirmasaun ho Manajer Banco Nasional Comersio Timor-Leste (BNCTL), Sukursal Oé-usse, Fernando Da Silva, nia parte rejeita atu fo komentario kona ba atrasa pagamentu no mos kondisaun hein atu simu pagamentu tamba ne’e kompetensia iha nivel nasional.
“Hau la bele halo komentario sobre asuntu ne’e, tamba laos hau nia kopetensia, ne’e sistema sentralizado. Arraska oituan halo intrevista,” hateten Manager da Silva.
