Tuir fiskalizasaun halao hosi membru Parlamentu Nasional (PN) iha Suku Bahatata Sub-Distritu Uatucarbau, Distritu Viqueque, komunidade sira lamenta ho atitude Grupu Bua-Malus ne’ebe ameasa atu sunu sira nia uma.
“Iha Sub-distritu Uatucarbau Suku Bahatata mos agora mosu organizasaun Bua-Malus. Ida ne’e mosu konflitu ona iha neba,” levanta Deputada Tereza Maria de Carvalho, iha plenaria Parlamentu Nasional, Dili, semana kotuk (24/01).
Deputada de Carvalho dehan Grupu Bua-Malus ne’e oras ne’e dadauk dada bandeira tolu iha suku ne’eba.
“Rua hasa’e ona, ida fali maluk balun lakohi atu dada bandeira ida ne’e entaun sira komesa iha konflitu hare malu ladiak e ameasa atu sunu uma,” dehan Deputada de Carvalho.
Nia sujere ba Ministeriu kompetente atu monta seguransa iha Sub-distritu ne’eba atu nune’e komunidade sira senti hakmatek.
“Dalaruma ema komunidade sira hato’o ita hanoin; dehan problema sira hanesan ne’e kik oan, mas depois mosu tiha konflitu mak ita foin hakfodak seguransa ba trankadu mas komunidade sira sai vitima tiha ona,” nia tenik.
Komunidade ida hosi Sub-distritu Uatucarbau, Distritu Viquque, ne’ebe lakohi publika nia identidade konfirma katak Grupu Bua-Malus komesa halo influensia ba komunidade suku ne’en atu involve aan ba organizasaun ne’e.
“Komunidade sira iha suku neen hanesan suku Wani-uma, Suku Irabin de Baisu, Irabin de Sima, Bahatata, Afaloi-Cai, no Loi-ulu, sira komesa influensa ona komunidade sira atu tama sira nia organizasaun ne’e,” hateten fontes konfirmadu ne’e.
Tuir nia mos katak Grupu Bua Malus mosu iha Sub-distritu Uatucarbau, Distritu Viqueque, hahu iha 2009 to’o agora.
Alende ne’e, Deolindo Xavier, nudar juventude hateten Governu tenki monta polisia sira iha ne’eba atu nune’e komunidade sira senti seguru.
“Agora ita hateten katak, besik ona iha kampanha no mos eleisaun grupu oi-oin deit mak mosu atu provoka situasaun iha rai laran,” dehan Juventude Xavier.
