Deputadu Natalino dos Santos preokupa ho kondisaun ponte besi iha Liquisa ne’ebe halis ona maibe governu seidauk halo buat ida no fo impaktu ba movementu transporte ba mai.
Tuir nia, kareta sira labele halai husi leten, tenki obriga sira liu husi mota laran maibe to’o agora governu seidauk halo buat ruma maske sosa tiha ona ekipamentus pezadu sira ne’ebe atu halo Estrada no ponte ho osan US$10 miloens.
“Kuaze semana tolu iha ne’eba ita liu ba-liu mai, kuandu ita liu husi neba ita tauk teb-tebes karik udan boot labele liu,” hateten Deputadu dos Santos iha plenaria Parlamentu Nasional, semana kotuk (30/01).
Deputado dos Santos hateten mos katak to’o agora ekipamentus pezadu sira iha Ministeriu Infrastruturas ninian maibe la haruka ba hadia mota ne’e.
“Tanba la ba hadia mak nia impaktu ponte besi ida ne’eba monu tiha, ne’ebe hau hakarak kestiona ekipamentu sira ne’e hola tiha ona halo saida,” Deputadu dos Santos kestiona.
Entertantu Presidenti Komisaun G Parlamentar, Deputado Pedro da Costa Martires, hateten ekipamentus pezadus sira la kobre hotu tanba nesesidade barak tebe-tebes.
“Ekipamerntus ne’e koloka iha Laklo, fatin sira ne’ebe mak hola koloka hotu ona iha neba, ita atu rezolve dala ida, ekipamentus sira ne’e la to’o,” dehan Deputado Martires.
Deputadop ne’e informa tan katak ekipamentus sira ne’ebe mak iha fahe deit ba brigada neen. “Brigada ne’ebe koloka iha ne’e mos nia aktividade limitadu ne’ebe labele atende dala ida deit.”
