Ajensia Nasoens Unidas UNICEF servisu hamutuk ho Ministeriu Edukasaun (ME) entrega sertifikadu ba estudante nain ne’en no profesores 17 ne’ebe kualidade diak husi eskola filial ne’ebe hola parte iha programa ‘Harii Eskola Foun’.
“Kriteria ne’ebe ami aplika ba professores sira atu hare kualidade mak ita hare husi metodu hanorin ho sistema moderna katak fo oportunidade ba estudante sira atu koalia no kria hanonin rasik.Profesores sira ne’ebe laiha kualidade ne’e tanba sei hanorin ho metodu tradisaun nian katak estudante barak liu no lahalo kontrola ba alunus.
Entau ho programa metodu hanorin ne’ebe ami implementa durante tinan rua resin ne’e iha mudansa duni no iha profesores barak mak halo mudansa ba metodu sira ne’e entau sira merese simu sertifikadu ida ne’e maske ho idade foin sae,” dehan Xefe Ekipa Monitorizasaun, Aurora Sarmento Quintão, semana kotuk (31/01), iha Salao Delta Nova, Dili.
Iha lidun seluk Asesora Programa ‘Harii Eskola Foun’ Debbie Katzman hateten kriteriu atu hili estudante ne’ebe iha kulaidade mak tenke kria mudansa iha sira nia eskola rasik.
“Alende halo aprendizajen, kria atividade hanesan atividade extra kurikular, halo to’os eskola kuda modo, halo lutu haleu eskola no kria grupu atu ajuda ema ne’ebe moras no vulneravel ne’ebe presiza sira nia tulun,” Asesora Katzman esplika.
“Eskola sira ne’ebe iha motivasaun hanesan ne’e ami fo premiu ba sira; ita hare realidade ne’ebe iha agora dadaun labarik mak sai protokolu ba programa sira, koalia Portugues diak los,” nia dehan tan.
Entretantu reprezentante UNICEF iha Timor-Leste, Hongwei Gao, hateten professores sira ne’e merese simu kondekorasaun ne’e nune’e bele motiva sira ho kapasidade ne’ebe sira iha bele sai lideransa no edukador ne’ebe kualidade ba labarik sira.
“UNICEF husu ba professores no estudante sira ne’ebe simu ona sertifikadu ho kategoria kualidade diak sira bele transforma kapasidade ne’ebe sira iha ba Director, professores no alunus sira seluk nune’e sira mos bele iha kapasidade ne’ebe hanesan ho sira ne’ebe simu ona sertifikadu,” dehan reprezentante UNICEF Gao.
Nia hatutan professores, estudante no diretores sira ne’ebe simu sertifikadu ne’e prense duni criteria ne’ebe UNICEF, ME no Instituisaun Nasional Formasaun Dosente e Profesionais da Edukasaun (INFORDEPE) deside hanesan halo mudansa ba eskola no kria programa rasik.
