Rezultadu peskiza ne’ebe mak Fundasaun Mahein (FM) halo ba portu temporariu ba Komponente Naval Forsa Defeza Timor leste (F-FDTL) ,identifika katak to’o agora foin mak atinji 30 pursentu.
“Ida ne’e fo impaktu bo’ot ba sira tanba saida? Fundasaun Mahein koalia bebeik katak,wainhira Governu atu hola ro ahi ami kestiona kona ba kondisaun ninian,”kestiona Kordenador Peskiza FM, Frei Dos Martires da Costa Guteres,semana kotuk,(19/10) iha Balide Dili.
Kordenador da Costa hateten mos katak FM sempre koalia bebeik wainhira Governu atu hola Roh tenki kria uluk kondisaun.
”Ita tenki iha portu,depois tenki kria ita nia ekipamentu konaba ofisina nebe mak halo manutensaun rasik ba ro ahi,”nia dehan tan.
Tuir Frei katak, ro ahi tolu nebe mak foin dadauk Korea ajuda ba Governu Timor leste labele para iha Hera tanba portu la iha.
Nia hatutan katak, konstrusaun ba portu ne’e mak la hotu lalais ro hat nebe mak para iha Hera hakarak ka lakohi tenki mai fali para iha portu Dili.
“Entaun impaktu bo’ot ba atividade ekonomia iha Portu Dili,”nia tenik.
Nia dehan, fo impaktu ba forsa Naval tanba wainhira atu halo manutensaun ba ro ne’e tenki atraka mai iha liur mak foin bele halo manutensaun.
NIa haktuir, konstrusaun ba portu ne’e hahu iha 2010 ho osan nebe parlamentu aprova hamutuk 7 miloens ho durasaun katak iha Dezembru 2010 tenki remata maibe to’o agora la remata.
“Depois ita mos rona katak,dehan iha failansu oituan konaba proposta nebe mak sira halo, Primeiru Ministru mos rekoinese katak,iha failansu tanba asina deit projetu maibe la hare,”nia komenta.
Nia mos eziji ba Parlamentu Nasional liu-liu Komisaun B atu halo fiskalizasaun ba portu ne’e.
“Labele tur deit iha parlamentu nasional depois hetan deit relatoriu husi Sekretariu Estadu Defeza katak portu ne’e atinji ona 70 pursentu,depois sira mos hateten dehan 70 pursentu,”nia kritika.
Entertantu Membru Komisaun B Parlamentar, Deputadu Paul Martins hateten, durante ne’e iha deit portu ida hodi uza ba merkadoria no mos pasajeiru ninian.
“Ita la’os koalia deit ba ro Nakroma maibe ita nia ro militar sira nian mos tenki iha fatin para wainhira ro at presiza halo manutensaun,”nia dehan.
Tuir Deputadu ne’e katak,atu halo manutensaun ba ro Timor seidauk iha rekursus umanu. “Ne’eduni laiha dalan seluk,ita tenki gasta oituan maibe tenki halo manutensaun ba iha rai liur,”nia katak.
Alende ne’e membru komisaun G nebe mak trata asuntu infrastruturas ,Deputado Arao Noe hateten, iha tinan kotuk parlamentu aprova ona orsamentu hodi prepara ba estudus hodi halo konstrusaun ba fatin ida atu halo manutensaun ba ro sira.
“Iha tinan kotuk kaer duni osan atu halo estudus para halo iha Tibar,agora preparasaun sira ne’e la’o hela,ita hein katak tinan ida ka rua ba oin ita iha ona fatin para halo manutensaun ba roh,” nia infoma.
