Maske eleisaun prezidensial besik dadaun ona (17 de Marsu 2012) no Partidus Politikus sira preparadu atu tuir kampanha maibe husi Komisaun Nasional ba Elisaun (CNE) seidauk determina loron atu hahu kampanha.
“Hau fiar katak,ema hotu agora halo ona preparasaun atu halo kampania prezidensial nian tanba kalendariu semana kotuk Prezidenti anunsia ona 17 Marsu,maibe CNE seidauk anunsia loron atu halo kampanha nian,”hateten Faustino Renan Selak husi Partidu UNDERTIM iha Parlamentu semana kotuk,(17/01).
Iha fatin hanesan Deputadu husi Bankada Partidu Demokratiku (PD) Adriano Joao hateten,maske CNE seidauk determina loron kampanha maibe sira iha kandidatu rasik atu kompete iha eleisaun agora.
“Partidu Demokratiku iha nia kandidatu rasik maibe la lori atributu partidu ninian,nia ba mos hanesan independente,”nia katak.
Tuir nia, katak maske agora seidauk maibe iha inisiu Marsu, Partidus Politiku hotu-hotu halo ona kampanha ba eleisaun prezidensial ninian tuir kalendariu ne’ebe mak CNE fo sai.
“Seidauk iha data fiksu maibe kampanha prezidensial durante loron sanulu resin lima de’it (15) la hanesan ho kampanha parlamentar,”Deputadu ne’e dehan.
Entretantu Deputadu Bankada Fretilin, Inacio Moreira hateten, partidu Fretilin hili ona ninia kandidatu atu kompete iha eleisaun sai hanesan Prezidenti da Republika mak Francisco Guteres (Lu-Olo).
“Ami hakarak hateten kandidatu partidu Fretilin ninian ema ida neb eke iha kapasidade intelektual,kapasidade servisu esperiensia nebe naton para ema hotu-hotu bele hili nia atu sai Prezidenti da Republika,“ Inacio katak.
Inacio hateten,partidu Fretilin horas ne’e dadauk halo hela perparasaun ba kampania nian nebe mak partidu desidi ona ninia kandidatu atu tama ba eleisaun ninian.
“Ami husu ba ema hotu-hotu ba sidadaun hotu-hotu atu asegura pas estabilidade atu nune’e eleisaun presidensial ninian tenki la’o ho hakmatek no la’o ho susesu,”Inacio tenik.
Alende ne’e ,Partidu Sosial Demakrata (PSD),Deputada Maria Exposto hateten,PSD la iha kandidatu tanba partidu deklara ona iha publiku katak,uniku opsaun ida livre ba nia militante no simpatizantes sira livre atu ba vota ba se deit.
“Agora data ba kampania ba prejidensial talves ami sei tuir reuniaun tanba ami rasik foin mak rona anunsia ne’e foin sai ,tanba ne’e mak ami nia partidu social demokratiku talves semana ida ne’e ami mos prepara ami nia data ba kampania”hateten Exposto.
Iha partes eluk ,membru partidu CNRT ,Pedro Martires da Costa hateten ,partidu CNRT la iha kandidatu rasik ba prezidensia maibe sei fo apoiu deit ba kandidatu independenti ,imparsial tuir konstituisaun no unidade nasional.
“Ami hein anunsiu husi ESTAE no CNE nebe fo sai lista nebe apurado,ami hare ida nebe priense kriterius ba ami,ami bele fo apoia”hateten ,Pedro.
Pedro dehan,partidu CNRT sei fo apoiu ba kandidatu independent nebe priense kriteriu nebe mak moris ho povu no garante unidade nasional.
