“Governu gasta osan deit maiibe la iha planu ida konkreta ba toilet publiku sira ne’e,”hateten Deputadu Mesquita semana kotuk (18/01) iha Uma Fukun Dili.
Deputadu ne’e hatutan, hakarak halo SP tenke kompleta ho bee moos nune’e komunidade sir abele utilize.
Tanba ne’e Mesquita husu ba Ministeriu kompetente atu kontrola di-diak nune’e ema labele estraga fatin ne’e. “Ita hare komunidade balun ba sintina tiha husik foer la hamos e halo fasilidade sira ne’e sai aat hotu,”nia komenta.
“Admistrasaun Distritu Dili responsabilidade ba iha ida ne’e tanba sira mak organiza ema ba hamos,”nia husu.
Entretantu tuir observasaun nebe TDW halo iha fatin neba nota katak,SP ida mak kompania sobu tiha ona tanba halo konstrusaun Jardin iha area Lesidere nian.
Enkuantu tuir negosiante Roda Tolu (R3) ne’ebe lor-loron fa’an iha Lesidere Eldito Gusmao katak governu laiha planu ne’ebe diak hodi harii sintina ne’e.
“Ami fa’an Gerobak iha ne’e to’o tempu ami presija soe be tenki fila ba uma mak foin bele soe be,”nia preokupa.
Tuir nia, SP ne’e desde harii to’o agora nunka loke ba publiku e odomatan hela deit.
Preokupasaun hanesan hato’o husi negosiante Jacinto Xavier,nia parte sente triste tanba sintina ne’e halo tiha osan ne’ebe bo’ot maibe la uza e governu nunka tau matan.
“Ita hare iha televizaun parlamentu aprova hela deit osan tinan-tinan ba iha Governu, dehan atu halo ba dezenvolvimentu maibe ita hare uma sira ne’e halo tiha husik hela deit hanesan ne’e,”nia dehan
Relasiona ho asuntu ne’e bainhira TDW koko konfirma ba iha Administrador Distritu Dili maibe lakonsege tanba Admistrador Ruben Braz la iha fatin.
