Fundasaun Mahein (FM), ejizi ba Governu atu loke tan Portu Dili hodi simu ro barak tanba klot liu ona.
“Hau senti ita nudar nasaun sobera ida, ita iha tranportasaun Maritima ba mai liu-liu ro, ita nia portu ne’e sei kikoan liu para atu simu ro sira nebe mak mai,” hateten Kordenador Peskiza FM, Frei da Costa Guteres, iha nia knar fatin iha Balidi, Dili, semana kotuk (19/1).
Kordenador Guterres hateten katak Portu Dili kik oan fo impaktu ba material konstrusaun sira nebe mai no mos distribuisaun fos ba rai
laran tanba wainhira ro tama tenki para iha tasi laran durante fulan rua ka tolu mak foin bele tama iha Portu Dili tanba ro balun para uluk ona no ro seluk tenki hein to’o sira fila.
Nia haten mos katak wainhira portu ne’e nune’e nafatin bele fo difikulta ba ro sira seluk inklui ro passajeirus, ro Berlin Nakroma.
“Tanba ita hatene ro ne’e mos tama sai hela deit, tula pasajeirus sira Dili ba Oe-cusse hanesan mos Dili ba Atauro.”
Alende ne’e Membru Parlamentu, Deputado Pedro da Costa, Komisaun G, ne’ebe mak trata asuntu Infrastrutura sublina katak,Portu Dili kondisaun klot duni maibe planu ba futuru Portu Dili sei la serve ona atu ro atu para.
“Iha ona planu. Tuir planu estratejiku dezenvolvimentu nasional sei hari portu komersial ida iha Tibar neba,” Deputado da Costa dehan.
Nia dehan mos katak horas ne’e dadauk iha ona estudu no mos dezeinu iha ona maibe iha tempu badak Governu actual sei la konsege implementa no tenki hein to’o Governu foun atu bele implementa.
“Wainhira implementa planu estratejiku dezenvolvimentu ne’e, Portu Dili bele muda fali ba Tibar I Portu Dili agora ne’e rezerva deit ba iha turismu,” informa tan Deputado da Costa.
Alende ne’e Deputado Arao Noe hatutan mos katak, Portu Dili kondisaun klot duni tanba loro-loron simu ro tolu, hat, to’o 10.
“Tanba ida ne’e mak Governu halo ona estudu iha Orsamentu 2012 tau kedas orsamentu fundu infrastrutura para halo ona konstrusaun portu iha Tibar,” hateten Deptuado Noe.
Kuandu portu Tibar mak halo ona, Portu Dili sei hela ba pasajeirus.
“Mas hau hanoin ida ne’e sei lori tempu mak konklui mas planu iha ona, iha medio prazu portu Tibar bele konklui.”
