Deputada Brigida Correia, CNRT, husu ba Comisaun Nasional das Eleisoens (CNE) atu foti medidas ba bandeira Partidu Politiku sira nian ne’ebe mak horas ne’e dadauk sei kontinua dada hela iha fati-fatin.
“Hau hakarak husu ba ita bot sira, ami mos hare iha fatin-barak iha simbolu nebe mak sei taka hela, no bandeira balun nebe sei dada hela iha fatin bara-barak, medida saida deit mak ita bot sira sei halo,” hateten Deputada Correia, iha PN semana kotuk (20/1).
Deputada ne’e hatutan tan katak besik ona eleisaun maibe bandeira sira ne’e kontinua dada iha fatin barak no husu CNE atu hola medidadas ba bandeira sira ne’e.
“Iha tinan hirak liuba katak, ne’e hanesan simbolu protestu ida maibe agora dadauk tama ona iha eleisaun, medida saida mak CNE servisu hamutuk ho parte Polisia atu bele foti.”
Entertantu Deputada Tereja de Carvalhu hato’o ba partidu politiku sira agora ba oin labele hasae uluk bandeira, depois ba Kampania mak bele lori Bandeira ne’e.
“Sekarik to’o loron votasaun mak simbolu ne’e sei iha, saida mak Comisaun Nasional Eleisoens (CNE ) atu halo ba ida ne’e,” husu Deputada de Carvalhu.
Deputada ne’e sujere ba CNE karik bele fo sansaun ba Partidu Politiku sira ne’ebe to’o horas ne’e bandeira sira dada iha fatin-fatin.
Iha fatin hanesan Deputado Francisco Branco, FRETILIN, hateten politika Fretilin nian mak hakruk ba lei tuir lei haruka.
“Karik iha lei ne’ebe bandu atu labele tau simbolu iha estrada no fatin ne’ebe deit ami hakruk, Deputado Branco hato’o.
Responde ba kestoens ne’e Prezidente CNE Komisariu Dr. Faustino Cardozo informa ba Partidu Politiku sira katak iha 2007 la iha partidu politiku ida hahu husi kik to’o bot la iha kandidatu ida ba prezidensial mak konsege hamos sira nia simbolu ida-idak nebe durante uza kampania eleitoral depois eleisaun remata tiha.
Nia haktuir katak regulamentu eleisaun nian hateten wainhira Eleisaun ida remata tiha liu loron ne’en kandidatu ou partidu politiku iha dever atu hasai simbolu husi fatin publiku.
“Lei konaba simbolu eksplisitamente la defini iha lei,” Komisario Cardozo hato’o tan.
Nia esplika tan katak maske lei presiza la iha, STAE hamutuk ho CNE hamosu regulamentu ida ne’ebe defini esplisitamente konaba simbolu kampania eleitoral.
“Tanba ne’e mak iha ne’eba ami defini katak, apos de eleisaun, uma semana depois tenki hamos fali [simbolos partidu] husi fatin publiku.”
Dr. Cardoso hateten tan katak sekarik partidu politiku sira la hamos simbolu sira ne’e, iha regulamentu ida tan mos defini katak CNE iha dever atu husu ba orgaun ne’ebe iha kompetensia repressiva, orgaun Estadu Polisia Nasional Timor-Leste, PNTL, atu bele hola medidas.
“Iha 2007 ami tenta atu halo tuir, depois ami haruka karta ba Polisia Nasional Timor-Leste atu oinsa ezekuta regulamentu ida ne’e maibe na pratika la konsege implementa tanba situasaun iha tempu ne’eba, PNTL iha UNPOL nia okos.”
CNE tenta husu PNTL atu hasai simbolu partidu politikus hosi fatin-fatin publiku maibe la konsege tanba PNTL la iha autoridade.
“UNPOL esplika katak, iha 2007 depois eleisaun, situasaun ne’ebe iha halo sira preokupadu ho situasaun siguransa tanba ne’e mak sira la fo atensaun oinsa para bele hamos simbolu sira ne’e husi fatin publiku.”
