Xefe Departementu ba Lisensiamentu no Akreditasaun Universitariu Vasco Viana hateten tinan ne’e Universidade Nasional Timor-Leste (UNTL) limita simu estudante foun e simu deit estudante ne’ebe ho valor aas.
“Tanba sa mak Ministeriu Educasaun halo limitasoens tanba bazea ba daya tampung ou vagas nebe UNTL iha, ita labele simu barak wainhira daya tampung ou vagas laiha, labarik sira atu estuda iha nebe balansu estudante ho dosen oinsa, ne’e maka husi ministeriu halo prosesu ida hanesan ne’e,” dehan Vasco Viana, Xefe Departamentu ba Lisensiamentu no Acreditasaun Universitariu, semana kotuk (13/1) iha nia knar fatin Kampus UNTL Dili.
Nia dehan, parte edukasaun hakarak estudante hotu bele tama iha UNTL maibe tenke iha balansu entree dosente no alunus. “tanba ne’e mak ministeriu halo kualifikasaun hare liu ba estudante sira ne’ebe mak ho kualidade diak no valor diak mak bele tama UNTL,”nia katak.
Entertantu tuir Deputadu Francisco Jeronimo, Vise Presidente Komisaun F Parlamentar katak, standar ida ne’e la’os foin mak UNTL aplika maibe desde tinan kotuk.
“Wainhira tama iha UNTL, UNTL sei la halo tes mais hare liu rezultadu Izame Nasional maka sai standar atu mai tama iha UNTL bazea ba kapasidade UNTL simu ema na,in hira,”nia dehan.
Tuir nia, Ministeriu fo ona informasaun ba estudante liceu sira, sekundariu atu estuda maka’as nune’e pasa iha izame nasional ho valor aas.
Deputadu ne’e hatutan, iha estudante barak maka la hatene informasaun ida ne’e, agora perguntas bo’ot maka estudante sira nebe maka labele tama iha UNTL sira atu ba nebe?
“Tuir lolos governu tenki fo ona atensaun ba eskola privadas sira nebe maka seidauk akreditadu ne’e hodi bele acreditadu ona para estudante sira bele tama mos iha universidade sira ne’e,” nia preokupa.
