Mediku Timor oan no estranjeiru ne’ebe hala’o knar iha Centru Saude (CS) sira iha Sub-distritu keixa tanba uma ne’ebe sira hela ba laiha fasilidade, maibe Diretor Jeral Ministeriiu Saude (MS) Agapito da Silva hateten governu sei tau atensaun maibe neneik.
“Hau lamenta mediku balun ne’ebe ba hala’o servisu iha sub-distritu komesa husu jeleira, eletrisidade no buat hotu-hotu, mais la’os ministerio lakohi fo maibe ministerio gradualmente tau sasan sira ne’e neineik tanba kapasidade ministerio mos iha nia keterbatasan,” hateten Diretor Jeral MS, Agapito da Silva Soares,semana kotuk (11/01) iha Kaikoli Dili.
Tuir nia oras ne’e dadaun CS iha Sub-distritu barak mak aat inklui mos fasilidade saude ne’ebe uza ba atu fo asistensia ba komunidade barak mak sei falta maibe mediku sira ejiji attu hadia uluk sira nia kondisaun hela fatin.
Nia espera katak iha 2013 sei iha tan osamentu ne’ebe sufsiente ba MS,nune’e bele hadia situasaun hirak ne’e inklui fatin ba sira hela la’os deit mediku sira maibe mos proefesional saude hanesan parteira no infermeirus sira ne’ebe servisu iha fatin ne’ebe la’os nia rai.
Nia mos husu ba mediku Timor oan sira ne’ebe atu koloka iha suku, Aldeia iha sub-distritus hotu atu komprende situasaun TL no servisu ho pasensia katak loron ida sira sei iha kondisaun diak atu servisu.
Iha parte seluk vise Presidente Komisaun F Parlamentar, Deputadu Francisco Jeronimo hateten tuir kontratu ne’ebe MS halo sira (mediku Timor oan no estranjeiru) katak sira pronto servisu iha area ne’ebe deit tanba governu selu sira.
“Se ejiji fali buat sira ne’ebe ita seidauk iha, ne’e hau hanoin ita mos ejejeradu ona (demais liu ) tanba ita seidauk iha eletrisidade maibe ita husu jeleira ne’e oinsa, se jelera iha eletrisidade laiha ita tenke monta fali jerador ne’e demais liu ona, ne’e hatudu katak ita la’os ema ne’ebe moris iha realidade nia laran,” nia katak.
